Hma kan sawn zel theihna turin Ngaihtuahna tihdanglam a ngai - CM

Science Teachers' Association, Mizoram (STAM) chuan nimin khan Synod Conference Centre-ah inkhawmpui an hmang a; khuallian, chief minister Zoram­thanga chuan, hmasawn zel theihna turin ngaih­tuahna tihdanglam a ngaih thu a sawi.

Chief Minister chuan, ram leh a chhunga chengte rualkhai leh ngêlnghet taka hma an sawn zel theihna tur sawiin, "Ngaihtuahna tidanglam a, ram chhunga awm sa leh neih sate ṭangkai lehzuala hmang thiam turin, mahni thawhna zâwn ṭheuha ṭhahnemngai taka thawh a pawimawh," a ti a, chutiang ni tur chuan science zirtirtu kal khawmte a sáwm.

Mizoramin zirnaah hma a sawn theihna turin sorkarin theihtawp a chhuah zel thu sawiin Zoramthanga chuan, "Zirtirtu leh mamawh dang hrang hrang phuhru tura hmalak zel a ni. Zirtirtute pawh theihtawp chhuah zel turin ka sawm a ni," a ti.

CM Zoramthanga chuan, ram hmasawnna atana hmalakna chu ramngaw leh nungcha humhalhna nena inkalh ni lo se ṭha a tih thu sawiin, "A kal kawp theih dan zawn zel a pawimawh," a ti a; thil tih dan phung ṭha lo te, environment tana ṭha lo thil hman ṭhin plastic leh a dangte thlakna a awm theih zel dan tur ngaihtuah chhuah a ṭul thu a sawi.

Khualzahawm School Education director Dr H Lalthlangliana chuan, zirtirtu indaih lohna phuhru tura sorkar hmalaknaah lawmthu a sawi a, zirtirtute chu an thawhna hmun chu khawi pawh ni se, hmanrua a ṭha emaw, ṭha lo emaw, inpekna rilru nen zirtir hna thawk zel turin a chah.

STAM General Con­ference vawi 35-na hi an vice president Lal­hmukima'n a kaihruai a, president Dr R Laleng­mawia'n an pawl hmalak dante leh hmachhawpte a sawi.

Chawhnu lamah Indian Institute of Technology, Gandhina­gar-a assistant professor Dr Krista Roluahpuia buatsaih 'Scientific thinking: Why is science important?" tih thupui zirho a ni.