Ruihhlo do tur CADS din a ni ta

Central YMA chuan ruihhlo dotu tur, Central Anti Drug Squad (CADS) a din thar leh ta a, nimin khan Central YMA Hall-ah CADS member turte lak luhna inkhawm buatsaih a ni. DIG Lalbiakthanga Khiangte, Excise & Narcotics commissioner Ngurchungnunga leh Aizawl SP C Lalruaia ten an hmanpui.

CADS member-te lak luhna inkhawm hi CYMA president R Lalngheta'n a kaihruai a, assistant secretary Prof. Malsawmliana'n ṭawngṭaiin hlanna hun a hmang.

CYMA President chuan, mualphona leh hmingchhiatna neih phah theihna a nih avangin ruihhlo do chu thil châkawm a ni lo a, YMA hruaitu nihna aṭang phei chuan a phûrawm loh zual tih sawiin, "Mahse, kan ram leh hnam dam nan leh ruihhlo laka kan ṭhalai tam tak an buai mek avangin, mualpho, hming hliau leh tuar huamin, kan ram leh hnam tan CYMA chuan thutlukna a siam a ni," a ti a; ruihhlo zuarte leh ruihhlo tite chu YMA member tho an nih avangin mimala huat an neih loh thu a sawi.

CYMA vice president Lalhmachhuana chuan, Mizoramah ruihhlo a hluar hle tih sawiin, "Kan ram leh hnam humhalh turin YMA kan pên chhuah leh a ngai a, theihtawp chhuaha hmalak a ṭul," a ti a; CADS member-te chu ruih theih thil laka fihlîm tur leh fimkhur taka rinawmna nena ke pên turin a chah.

CYMA general sec­retary Prof. Lalnun­tluanga'n CADS din a nih dan a sawi a, "Ruihhlo do hi YMA kumpuan ‘Ram leh hnam humhalh’ tihhlawhtlinna tur zinga mi a ni a, hlau leh khûr chungin kan bei dawn lo a, sorkar hriatpuina hnuaiah a tàwp thlengin YMA chuan thâ thlah loin ruihhlo a do dawn a ni," a ti.

CADS member tur hian Aizawla YMA branch tinin mi pakhat ṭheuh an ruat a, batch khatnaah hian member 54 an awm a, September leh October chhung an thawk dawn a ni.