Chakai farm uar tlâk leh tlak loh Tun dinhmunah hriat a la ni lo

Fisheries minister K Lalrinliana chuan, tun dinhmunah chakai farm uar zel tlâk a nih leh nih loh hriat theih a la nih loh thu Assembly session neih zawh takah khan House a hrilh.

ZPM member Lalduh­oma zawhna chhangin K Lalrinliana chuan, Dumlui, Kolasib district-a chakai farm atan cheng nuai 37 hman tawh a nih thu tarlangin, "SEDP sum hman a ni. July 10, 2020 khan 2,000 dah a ni a, a hnu September 23, 2020 khan 1,000 dah leh a ni. Chumi hnuah chakai dah belh leh a la ni lo," a ti.

Fisheries Minister chuan, chakaite chu 40%-50% dam chhuak anga ngaih a nih thu tarlangin, "Chakai hian a puitlinna atan thla 10 aṭanga thla 12 a duh," a ti a, chakai farm aṭangin chakai hralh chhuah a la awm loh thu a sawi bawk.

Chakai farm project chu uar zel tlak a nih leh nih loh zawhna chhangin Fisheries Minister chuan, "He project hi pilot pro­ject anga kalpui mek a ni a, tun dinhmunah uar zel tlak a nih leh nih loh hriat theih a ni rih lo," a ti.