Congress party-in telna tlâkah Boundary Committee an ngai lo; an inhnûkdâwk

Congress party chuan Mizoram-Assam ramri chingfel dan kawng zawng tura Mizoram sorkarin a din Boundary Committee chu tel zui zelna tlaka an ngaih loh avangin an inhnûkdâwk. PC party pawhin Boundary Committee ṭhutkhawmah tel an tum loh thu an lo puang tawh bawk.

Mizoram Pradesh Congress Committee general secretary John Siamkunga chuan Sep­tember 8, Ningani khan Boundary Com­mittee Member-Sec­retary, Home department Secretary ni bawk hnen­ah lehkha thawnin, Committee aṭanga an inhnuh­dawh thu a hriattir a ni.

MPCC General Sec­retary lehkhaah chuan, ramri chungchanga Mizoram sorkar hmalakna kal zel dan an enin, Com­mittee chu a hming maia awm a ang taa an hriat thu an tarlang a, "Mizoram sorkar leh Assam sorkar aiawhte inbiak dawn leh joint statement ṭum hnih (5th August 2021 leh 9th August, 2022) siam dawn pawhin Boundary Committee hi ràwn a ni lo," an ti.

MPCC chuan, joint statement-ah ramri hrûla police-te ve ve hnuhkîr leh sorkar laipuia neutral force dah remtih a nih tawh thu leh kum 2021-a ramria inkahnaa Assam police thite tuarpuina thute ziah lan a nih tawh thu an tarlang a; ramri hrûlah buaina a chhuah tawh lohna tura ruahmanna pawh joint statement-ah hming ziah hnan thlap a nih tawh thu an sawi bawk.

MPCC chuan, "Hetiang hi thil awm dan a nih avangin September 9, 2022-a Boundary Committee meeting-a joint statement review tura chhawp te, Assam nena kan ramri chungchanga kan ṭan chhan tur ngaihtuah leh tura chhawp leh pawh hi mipui hmaa hmai phih fai tumna angah kan ngai. Chuvangin, September 9, 2022-a Boundary Committee meeting-ah aiawh intir tawh loin, Committee aṭang hian inhnûkdâwk nghal ila kan ti," tiin MPCC chuan an ziak a ni.

Congress party chuan, an party chhungah Boundary Committee an neih hmangin Mizoram leh ṭhenawm state-te nena ramri chungchanga harsatna awmte chu uluk takin an en zui zel dawn tih an tarlang bawk.

Peoples Conference party acting president Vanlalruata pawhin Sep­tember 8, 2022 khan thuthar theh­darhtute hmaah, Boundary Committee ṭhutkhawma an tel loh tur thu leh Assam-Mizoram joint statement siamṭhat a nih loh chuan tel an tum tawh loh thu a puang a ni.