Aizawl khawpuiah ni riat chhungin Lirthei dan bawhchhia mi 393 man

Mizoramah September 1, 2022 aṭanga Motor Vehicles (Amendment) Act, 2019 hman a nih hnuah September 8, Ningani thleng khan Aizawlah lirthei hmanga dan bawhchhia mi 393 leh lirthei 409 man a ni tawh a, pawisa chawi tling khawm Rs 2,02,400 a tling.

Traffic Police hotute hnen aṭanga Vanglaini thu dawn danin, ni riat chhunga lirthei khalhtu dan bawhchhia an man 393 zinga 126 chu MV Act/Rules 177 bawhchhia an ni a, lirthei dah phal lohna hmuna dah mi 80 man niin, danin a phal loh thawmhnaw inbel (improper dress) avangin mi 32 man a ni bawk.

Lirthei dan bawhchhia 409 man zingah two wheeler tam berin, 293 (71.63%) a ni a, two wheeler khalhtute sum chawi zat chu Rs 1,42,200 a ni. LMV 78 man niin, Rs 47,300 an chawi a, HMV 24-in Rs 7,800 leh taxi 14-in Rs 5,100 an chawi bawk. Pawisa chawi zawng zawng chu Rs 2,02,400 a ni.

Traffic Police hotute chuan, HDFC bank nen inthlun zawmin traffic officer-te'n an duty-na hmuna pawisa an chawitir nghalna khawl, easy tap an kawl thu an sawi a; khawla pawisa lut zat chu thla khat hnuah chauh report an lâk khawm theih avangin tun dinhmunah hriat theih a la nih loh thu sawiin, "Easy tap hmang hian card swipe pawh tih theih a ni," an ti.