Minister conference-ah Dr Thangtea a tel

Union Minister of Mines, Parliamentary Affairs, Coal & Mines hoa Hyderabad-a National Mines Ministers’ Conference neih mekah nimin khan Geology and Mining minister Dr R Lalthangliana a tel.

Dr R Lalthangliana chuan, major mineral lai chhuaktu - Mining Lease neituten royalty (State Own Non-Tax Revenue) an pek bakah, additional royalty 2% an pek tling khawm National Mineral Exploration Trust Fund-a an chhûn luh, major mineral zawn chhuahna atana hman ṭhin chu minor mineral - lung, balu, leirawhchan, adt. zawn chhuahna senso atana hman phal a ṭul thu a sawi.

Ministry of Mines-in kum 5/6 vel kal taa hmarchhak state-te a puih bik ṭhinna NE Special Assistance Programme chu chhunzawm leh a ṭul thu sawiin R Lalthangliana chuan, "Hei hian leilung hausakna zawn leh laih chhuahnaah hmarchhaka Geology & Mining-te nasa takin a tichak thei dawn a ni," a ti.

Dr R Lalthangliana chuan, Star Rating of Mines Template chu The Mizoram Minor Minerals (Concession and Prevention of Illegal Mining) Rules, 2022-ah dah luh a ni a, pawm a nih veleh hman a nih dawn thu a sawi a; District Survey Report, Environmental Management Plan leh leilung hausakna zawn chhuahna atana Ministry of Mines-a cheng nuai 518 dil mek chu pe thuai turin a ngen.

Conference hi ni hnih awh tur a ni a; a tum chu - Ministry of Mines leh state sorkarte'n lei chhung hausakna zawn leh laih chhuahnaa thawhhona ṭha zawk an neih leh kum 25 lo la awm turah India ram chu mineral sector-a ram intodelha hlan kai a ni.

R Lalthangliana hi Geology & Mining deputy controller of mines Lalremmawia'n a ṭawiawm a ni.