Sorkar hnathawk hlawh a hun takah release a ni leh dawn - Lalruatkima

Land Revenue & Settlement (LRS) minister Lalruatkima, MNF adviser ni bawk chuan, The Mizoram (Land Revenue) (Amendment) Bill, 2022 chu thingtlang mi tan malsawmna a nih dawn thu leh, sorkar hnathawk hlawh a hun takah release a nih leh dawn thu a sawi.

Nimina Mizo Hnam Rûna inkhawmah Lalruatkima chuan, The Mizoram (Land Revenue) (Amendment) Bill, 2022 ṭhatna tur a sawi a, "Thingtlang mi tan malsawmna a ni dawn. Mi retheite tana ṭha tur zawk a ni. House-a amendment siam tam zawk hian mi retheite a nék sáwr ngai lo," a ti.

Lalruatkima chuan, The Mizoram (Land Revenue) (Amendment) Bill, 2022 chungchangah eptu MLA House aṭanga a chhuak chu a chian loh vang nia sawiin, "A hriat lohzia a inhre lo a ni. LSC an duh reng, an neih theih loh kha property card an nei ang a, property card hmangin loan an la thei tawh dawn. Tuna zangnadawmna lakna tur hoah hian cut a ni dawn lo, thil kal mek a nih avangin thil lo la awm turah chauh cut a ni dawn," a ti a; Congress sorkarin Mizoram Land Revenue Rules, 2017 an siam a, act-ah an siam lo niin a sawi.

Minister chuan, sorkar hnathawk chungchang sawiin, "Pathianin kan sorkar min véng a, sorkar hnathawk hlawh pawh a hun takah release a ni leh mai dawn," a ti.

BADP hna aṭangin 25% ei leh ei loh chungchangah Ruatkima chuan, "25% hi ei tur a awm lo, lak tur pawh a awm lo," a ti a; house pass dilna minister kaltlanga tih ngai chungchangah, "Congress sorkar laia kalpui tawh anga kalpui zel a ni," a ti a; surveyor indaih se chuan an thlah zalen thei reng niin a sawi.

Lalruatkima chuan, MNF sorkar hnuah zirtirtu muster roll leh SEDP hnuaiah mi 3,000 chuang lak a nih tawh thu te, two wheeler taxi permit 3,000 vel pek a nih tawh thu te, kum 2023 inthlanah MNF an sorkar leh ngei a rin thu sawiin, "Kum hnih chhung hun ṭha loa min hruaitu hian hun ṭha min pek hi ka ring tlat a, kum nga dang, a vûr kum Pathianin min pe lehin ka ring," a ti.