Sual bâwiha tángte chhanchhuahna Sorkarin a ngai pawimawh - RRR-a

Ruihhlo ngaite enkawlna hmun Operation Kingdom Ministry (OKM) home, Phunchawng chuan nimin khan Annual Sports khârna an hmang a; an hun hmanpuitu minister of state Robert Romawia Royte chuan, ruihhloa harsatna nei leh sual bâwiha tángte chhanchhuahna Mizoram sorkarin a ngaih pawimawh thu a sawi.

Robert Romawia Royte chuan, Mizoram sorkarin ṭhalai, ruihhloa harsatna nei leh sual bâwiha tángte chhanchhuahna a ngai pawimawh tih sawiin, "Mahni mihringpuite hmangaih a, humsual daite chhanchhuah duhtu Chief Minister kan nei hi kan vannei hle a ni," a ti a; India ram hmun dang aiin Mizoramah ruihhlo ngaite enkawlna a tam thu sawiin, ruihhlo vanga home dinte titlem a, khâr hial thei tura ruihhlo um bo hun nghahhlelhawm a tih thu a sawi bawk.

Minister hian OKM home-a awm mi 300-te tan table tennis board leh infiamna hmanraw hrang hrang bakah, buhfai ip 100 leh bawng sa a pe a ni. OKM hi kum 2014 khan Chhinga Vengah din a ni a, zirlai 270 vel leh thawktu 30 vel an awm mek a ni.