Session ngai pawimawh tâwk loah ZPM Ṭhalaiin MNF sorkar an puh

ZPM Ṭhalai chuan thuchhuah siamin, MNF hruai Mizoram sorkar chu Assembly session ngai pawimawh tâwk loah an puh a; chutih rualin, September 6-8, 2022 chhunga Assembly session neihah ZPM Legislature Party member-te an che ṭha tih an tarlang.

ZPM ṭhalaite chuan, session neih zawh takah ZPM MLA-te an che ṭha nia sawiin, "An chêt ṭhat avang leh an taimakna avanga tun dinhmuna sorkar nihphung mipui hmaa phochhuah a ni hi lawmawm kan ti hle. MNF-in kum 2018 inthlanpuia an manifesto tihhlawhtlin an la neih mumal lohzia leh an manifesto an ngaihthahzia te, SEDP ngei pawh an ngaihthahzia Assembly session-a ZPM MLA-te zawhna kaltlangin chiang takin a hriat theih a ni," an ti.

MNF sorkarah Assembly session hun chhung a tâwi ṭhin chu pawi an tih thu sawiin ZPM ṭhalaite chuan, "MNF sorkarin mualpho an hlauh luatah session hi rùn dâlah ni rei lo te chhung an ko ṭhin niin a lang. Tun ṭum session-a Education Minister hmuh tur a awm lo leh session laia sap ram lama a zin daih hi a thlang tlingtu mipui zahlohnaah kan ngai," an ti a; tun aia session ngai pawimawh turin MNF sorkar an chah a ni.