Hindi zirtirtu atana hnam dang pahnih lâkte bàn turin sorkar phût

Mizoram Hindi Zirlai Pawl (MHZP) chuan, tun hnaia CSS hnuaia Hindi zirtirtu tur lâkah Recruitment Rules kalhin Mizo ṭawng thiam lo hnam dang pahnih lakte chu bàn an phût a, chawlhkar hnih chhunga bàn an nih loh chuan an dodal dawn thu an puang.

MHZP chuan thuchhuah siamin, CSS Hindi zirtirtu atan hnam dang pahnih dan kalha lak chungchangah August 8, 2022 khan Chief Minister leh School Education Minister an hmuh tawh thu an tarlang a, "Ram leilung fate chanvo chhuhsakna hi nakin zelah kan ram leh hnam tan a him dawn loa kan hriat avangin August 2022 thla chhunga bàn an nih theih nana hma la turin CM leh Education Minister kan lo ngen tawh. Samagra lamin min ngen angin chawlhkar hnih chhung, September 16 thleng kan nghak leh dawn a ni," an ti.

Ram leilung fate chanvo chhuhsak pawi tih lohna leh zirlaite hmakhua atana pawi thei a nih avangin chak leh zuala hma la turin sorkar an ngen tih sawiin MHZP chuan, "He thilah hian a khawihtute zingah inphúm rû an awm em ni? Ram leh hnam hmangaihna rilru pu lo, ram leilung fate chanvo chhuhsak pawi ti lo an awm a nih ngat chuan kan en liam dawn lo," an ti a; chawlhkar hnih chhunga bàn an nih loh chuan an thiam angin hma an la dawn tih an tarlang a ni.