Covid-19 positive enkawl lai 323 an awm

September 8, Ningani khan Mizoramah Covid-19 vei mi 68 hmuh chhuah a ni a, nimin khan hripui vei dam tawh mi 54 chhuahtir an ni. Covid-19 vanga thi an awm belh lo a, nimin tlai khan Covid-19 positive enkawl lai mi 323 an awm.

Ningania Covid-19 positive hmuh thar mi 68-te chu mipa leh hmeichhia 34 ve ve an ni a, rapid antigen test hmanga hmuh chhuah vek an ni. Swab sample 442 endik aṭanga positive zat chu 15.38% a ni a, a záwnin ni 11 chhung positivity rate-in 20% a tling tawh lo.

Nimin khan hripui vei dam tawh mi 54 chhuahtir an ni a; district hrang hranga chhuak zat chu Aizawlah mi 22, Mamitah 18, Lungleiah pakua, Saitual leh Khawzawlah pahnih ve ve leh Siahaah pakhat an ni.

IDSP record angin, Mizoramah Covid-19 vei 2,37,651 hmuh chhuah a ni tawh a, mipa 1,10,685 leh hmeichhia 1,26,966 an ni a, mipa aiin hmeichhia 16,281-in an tam zawk. Nimin tlai dar 5 thleng khan mi 2,36,606 (99.56%) chhuahtir an ni tawh a, mi 722 (0.30%) thi tawhin, enkawl mek mi 323 (0.14%) an awm.

Kum 2011 chhiarpui angin, Covid-19 vei hmuh tawh 2,37,651 chu state mipui zat aṭangin 21.66% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.