KHAWTHLIR

Naupang inkhawmpui
Naktuk Pathianni hi Mizo Sunday School Union hnuaia naupang sunday school-te inkhawmpui ní a ni a, hripui léng avanga kum hnih chhung neih a nih loh hnuah pastor bial hrang hrangah naupangte an inkhawmpui dawn. Naupangte'n thu leh hla hmangin Pathian thu an puang dawn a, pastor bial tam takah chuan naupangte an intihsiak dawn a, bial eng emaw zatah chuan intihsiakna angin kalpui a ni lo thung. Naupang inkhawmpuiah hian Beginner aṭanga Sacrament department-te an tel dawn a ni.

Thisen pe
J Buana College NSS chuan nimin khan an college-ah Christian Hospital, Lunglei tan thisen unit 98 an pe a, petute mipa 69 leh hmeichhia 29 an ni. KṬP, Ṭhuampui Pastor Bial pawhin thisen pek huaihawtin, Civil Hospital, Aizawl tan thisen unit 35 an pe a, petute mipa 32 leh hmei­chhia pathum an ni.

Tlantir dawn lo
Lunglei District Transport Officer chuan nimin khan thuchhuah siamin, sorkar chawlh (holiday)-ah Aizawl leh Lunglei inkarah MST bus tlântir a nih tawh dawn loh thu a tarlang. DTO tarlan danin, July-August, 2022 chhung khan Aizawl-Lunglei MST bus-ah sorkarin hlêp a nei lo a, a chawi belh zawk a ni. Pukpuia MST bus tlân dan tur pawh siam thar a ni a, September 2022 chhung enchhin a ni ang.

Zirna sawiho
Lawngtlai district bawrhsap Amol Srivastava hoin nimin khan a pisaah DC Office-a official-te leh School Education department hotute'n zirna tihhmasawn dan tur an sawiho. Mid-Day Meal Cell-in sikula chawchhûn semte a khát tâwka an endik theih nan Samagra Shiksha Additional DPC-in rua­hmanna siam se, an ti.

Lehkhabu tlangzarh
Mizoram buai laia administrative officer (AO) hna chelhtute'n an tawnhriat an ziah lak khawm Champhai DRDA project director B Lalchhawntluanga buatsaih, 'Zoram buai laia AO-te' tih lehkhabu chu nimin khan Champhai bawrhsap James Lalrinchhana'n a tlangzarh.