Kut hnathawktute sum tura hlâwkna neih tum Sorkar hnathawk an awm ṭhin - Chief Minister

Chief minister Lal Thanhawla chuan, sorkar hnathawk zingah, kut hnathawktte dawn tur ṭanpuina sum aṭanga hlâwkna hmuh ve tum an awm awm ṭhin niin a sawi.

All Mizoram Farmers Union (AMFU) leh CISR-NEIST, Jorhat-te thawhhona, 'Aroma and Phyto-Pharmaceutical Mission' nimina Lunglei Convention Centre-a a hawnnaah Chief Minister chuan, "Kut hnathawktute chawikanna kawngah harsatna awm ṭhin pakhat chu, sorkar hnathawk ṭhenkhat, kut hnathawkte dawn tur ṭanpuina suma hlâwkna hmuh tum an lo awm ṭhin hi a ni. Hetiang tih ching in hria a nih chuan hremna pe thei, thuneitu sang zawkte hriattir ngei ngei tur," a ti.

Lal Thanhawla chuan, sorkar hnathawk emaw, kut hnathawkte pawh an mawhphurhna leh an eizawnna chu an rawngbawlna a ni tih an hriat a ṭul thu sawiin, "Ram leilung fate zawng zawng chuan mawhphurhna an neih dan a inang tlang vek," a ti a; ram hmasawnna tura ṭan lak ngai laiah lungrual taka thawhho a ṭul thu a sawi.

Chief Minister chuan, tun hmain com­pany-te thurâwn ang leh duh zawng thlai chíng ṭhin mah ila, company duhkhawp thar chhuah a nih ṭhin loh avangin thawhhona a awm chhunzawm ṭhin lo tih a sawi a, "Company mamawh zat, vai ho pawhin tam an tih ang thar chhuak tura ṭan lak a ngai. Mizote'n tam kan tih hi company-te nen thawho a nih dawn chuan a tlem ṭhin a, hlawk tham tura tam thar tura ṭan lak a ngai a ni," a ti.

Mizoram economy tihrisel thei tur leh state per capita income tipung thei tura AMFU-in hmalakna a chhawp chhuak thei chu lawmawm a tih thu sawiin CM Hawla chuan, "AMFU hmalakna chu a remhriat thlak hle," a ti a; Mizoram, hmun nuam, leilung ṭha, thlai leh thei chi tinreng ṭhatna hmuna hausakna inphúm hai chhuak turin a ngaihna hria mithiam tam zawk an pên chhuah a ngaih thu a sawi.

CISR-NEIST director Dr Pinaki Sengupta chuan, Mizoramah Aroma and Phyto-Pharmaceutical Mission a hlawhtlin a rin chhan sawiin, "Mizoram mipuite ziak leh chhiar thiamah a ber zinga mi an nih avang leh Mizote'n an tuina tawh phawt chu, football-ahte pawh India ramah a ber an ni thei. He mission pawh hi an tihhlawhtlin theih ka ring," a ti.

Aroma and Phyto-Pharmaceutical Mission hian India hmarchhak bialah ram hectare 800 a huam dawn a, chu'ng zinga hectare 500 chu CISR-NEIST chuan AMFU kaihhruaina hnuaia Mizoram chhunga thawh turin a ruahman. Citronela leh lemon grass-te chu di-léngsèr an tih ang chi, hriak tam tak pai a ni a; hriaka her a nih hmain a hnim hnah têl khawm kg. 1 chu Rs. 800 aia tlawmin lei tur a awm mang lo.

Thlai ṭiak hi tun kar chhungin Mizoram a thleng kim tura beisei a ni a, Aroma Mission-in pilot district-ah a thlan angin Lunglei district-a kut hnathawktute'n an ching hmasa ber dawn a ni.