ACH-in NQAS certificate a dawng

State Quality Assu­rance Committee, Mizo­ram chuan nimin khan Aizawl Civil Hospital (ACH) hnenah state level certification for National Quality Assurance Stan­darts (NQAS) an hlan.

NQAS certificate hlan­na inkhawm hi Secre­tariat conference hall-ah neih a ni a, Health secretary Lalrinliana Fanai, State Quality Assurance Committee chairman ni bawk leh NHM mission director Dr Lalrozama ten an hmanpui.

Lalrinliana Fanai chuan, thawktute inpekna rah duhawm an seng chu lawmawm a tih thu sawiin, India ram pumah pahnihna dinhmun hial hauh thei leh hmarchhak state-ah pakhatna dinhmun luah thei tura thawhhona ṭha an nei chu fakawm a tih thu a sawi.

Dr Lalrozama pawhin thu sawiin, "Tunlaiah public sector aia private sector-te'n san lam an pan mek laia vantlang mi náwlpui chhawr phak ni bawk sia hlawhtlinna kan hmu hi thil ropui tak a ni a; he quality hi hmasawn leh zual thei tura kan vawn nun reng a ngai," a ti.

State level NQAS certi­ficate dawng tur hian sorkar laipuiin tehfung hrang hrang a siam sa, Quality Asurance Standard hmangin vawi tam tak endika point pek a ni a; chumi hnuah ACH chuan 70% hmuh turah 83% a hmu a, state level NQAS certification dawng turin a tling a ni.

ACH hian Central-in assessor tur mithiam pathum a tirhte'n tehna hrang hrang hmanga kar khat chhung an endik hnuah national level assessment pawh paltlang­in 81% an hmu a, April 2017 khan national level NQAS certification dawng thei turin an tling tawh. National level NQAS certification hi August 30, 2017-ah hlan a ni ang.

ACH hi India rama NQAS certification dawng thei pahnihna an ni a, India hmarchhak state zingah a dawng thei hmasa ber a ni.