BDS seat hmuh belh a ni

Higher & Technical Education (HTE) minister R Romawia leh secretary Benjamina ten sorkar laipuia thuneitute an hmuh hnuah, Mizoram chu Central pool aṭangin BDS seat pali pek belh an ni.

MBBS seat erawh chu pek belh la ni chiah lo mah se, pek belh a nih ngei Mizoram sorkar thuneitute'n an beisei. Medical course zir tur thlanna atan hian vawiiah counselling neih a ni dawn.

HTE Minister leh Secretary-te hian August 23 tlai dar 4:15 Ministry of Health & Family Welfare secretary CK Mishra an hmu a, Mizoramin Central pool aṭanga MBBS/BDS a hmuh tlem tak chung­chang an sawipui. CK Mishra hian BDS seat pali pek belh a nih tur thu a lo hrilh a; MBBS pawh seat awm thei ang ang an pek tur thu a lo hrilh a ni.

HTE department hotu­te hi Delhi-a Mizoram principal resident commi­ssioner Arvind Ray, OSD Umakant leh addl. resident commissioner David Lalthantluanga ten an ṭawiawm.

Hetih lai hian, MBBS leh BDS atan hian vawiin chawhma dar 10 aṭangin HTE (Technical Wing) pisa, Chaltlangah coun­selling neih ṭan a ni dawn.

Counselling nei thei tur hian NEET-a 66 percentage hmu chin kal theih a ni a, hei vang hian a hma aiin counselling kal thei an tam a dawn ni. Counselling kal thei chin tihdanglam a nih chhan chu BDS seat luah khah zawh loh hlauh vang a ni.