2016 aiin 2017-ah thubuai a tlem zawk

Mizoram Police officer-te chuan nimin khan Police headquarters-a Arya Mess-ah crime review meeting an nei. Kum 2016 aiin kuminah thubuai ziah luh a tlem zawk tih meeting-ah hian tarlan a ni.

Crime review meeting hi DIG Joseph Lalchhuana hoa neih a ni a, Mizoram pum (Northern Range leh Southern Range) huap a ni.

January leh July (thla sarih) chhunga kum 2016 leh 2017-a thubuai ziah luhte khaikhina zirho a ni a; district SP-te leh Traffic SP te, SDPO-te an tel.

Meeting-a tarlan danin, January-July 2016 chhung khan thubuai 1,596 ziah luh a ni a, kumin January-July chhungin thubuai 1,527 ziah luh a ni thung. Nikum aia kumina thubuai ziah luh a tlemna chu 69 a ni a, chu chu 4.32% a ni.

Thubuai ziah luh zat hi Aizawl, Lunglei, Siaha, Cham­phai, Lawngtlai leh Mamit district-ahte kum 2016 aiin kum 2017-ah a tlem zawnk a; Kolasib district leh Serchhip district-ahte kum 2017-ah a tam zawk thung.

DIG Joseph Lalchhuana chuan, SP-te leh SDPO-te chu an hnathawhah lawmthu a hrilh a; an bial chhung ṭheuhah nasa leh zuala ṭan la turin a fuih bawk.