MZP-in Chakma zirlai sikul kai tur an dang

MZP sub-headquar­ters, Tlabung hruaitute chuan August 23, Nilaini khan Tlabung High School-a kal Chakma zir­laite sikul kai tur an dang.

Tlabung MZP thu­chhuah chuan, Tlabung H/S-a Chakma zirlai ṭhen­khatin Mizo zirlai hmei­chhiate class chhung­ah diriam tak leh ṭawngkam ṭha lo, zah­mawh ṭawngkam an hman khum ṭhin niin an tarlang a, chuvang chuan Chakma zirlaite sikul kai tur an dang tih an sawi.

Tlabung H/S-a Mizo zirlai hmeichhiate chunga Chakma zirlaite chêt dan chu en liam mai chia an ngaih loh thu sawiin Tlabung MZP chuan, "Chakma zirlai misualte chungah zirtirtute'n action la a, sikul aṭanga hnawtchhuak nghal turin kan ngen. Tlabung H/S-ah an lut ve duh a nih chuan ṭha taka awm turin Chakma zirlaite kan chah a, Mizo hmeichhiate chunga ṭawngkam hman danah fimkhur turin kan chah a ni," an ti.

Tlabung MZP chuan, Chakma zirlaite'n Mizo hmeichia zirlaite hnenah ṭawngkam mawi lo an sawi chhuak a nih a, an chungah eng pawh thleng se, Chakma zirlaite cho chhuaha an ngaih tur thu an sawi a; Chakma zirlaite chu an birth certificate enfiahsak vek an tum thu an sawi bawk.