New India Movement zirna buatsaih
Kolasib District Rural Development Agency (DRDA) chuan, nimin khan Parish Hall-ah sorkar laipui programme thar, New India Movement zirhona an buatsaih a, parliamentary secretary Hmingdailova Khiangte-in a hmanpui.
Hmingdailova Khiangte chuan, India-in British awpna aṭanga zalenna a sual chhuak angin, tunah hian saltànna chi hrang hrang aṭanga zalenna sual chhuah a ngai tih a sawi a, "Kan saltànna hrang hrang - chibing inthliarna, sakhaw inthliarna, firfiaka chêtnate leh a dangte aṭanga kan chhuah theihna tur leh, India thar (New India) siam tura Prime Minister hmalakna hi a hlawhtlin theih nan mi tinin mawh kan phur a ni," a ti.
Nimin vek khan Sihphir community hall-ah New India Movement zirhona buatsaih a ni bawk a, government deputy chief whip RL Pianmawia'n a hmanpui.
RL Pianmawia chuan, India ram thar kai tur chuan mipuite'n mi dangte tih tura dah lo a, mahni mawhphurhna ṭheuh hlen chhuah a ṭul tih a sawi a, "Retheihna ûmbo tura sorkar hmalaknaah mipui ṭawiawmna leh tih tak takna a pawimawh. Central leh state sorkarin mi retheite dâwmkanna tur ruahmanna a siam kaltlanga an thil dawnte a hmanna tur dik taka hman a pawimawh a ni," a ti.
New India Movement hi India mipuite'n August 1942-a Quit India Movement an huaihawt champha vawi 75-naah ṭan a ni a; Quit India Movement neih a nih aṭanga a kum nganaah chiah India ramin Britain awpbehna ata zalenna a lo hmu ta angin, New India Movement ṭan aṭanga a kum ngana, 2022-ah chuan India ram chu bawlhhlawhna, retheihna, hlemhletna, rawlral leh firfiaka chetna, sakhaw intihbingna leh chi inthliarna lakah zalen turin hmalak a ni.