Covid-19 do nan sorkar hnathawkte'n May - Dec hlawh an thawh dawn
Mizoram sorkara hnathawk pawl hrang hrangte chuan Covid-19 donaa a ṭula hman atan an hlawh aṭangin thla riat chhung sum pek an rêl a; hei hi kumin May thla aṭanga December thleng a ni ang.
Mizoram sorkar hnuaia sorkar hnathawk pawl 75 aiawhte chu nimin khan chief secretary Lalnunmawia Chuaungo kaihhruaiin Administrative Training Institute (ATI) Auditorium-ah an inhmu khawm a; Covid-19 dona atana sorkar hnathawkte'n pawisa an thawh dan tur sawihoin, an hlawh aṭangin 10% thla tin pek an remti a ni.
Chief Secretary chuan, Covid-19 vangin Mizoram chauh ni lo, India ram leh khawvelin kawng hrang hranga harsatna an tawh dan a sawi a, "Mizoram kan la him rihin a lang nã a, India ramah chuan a ni tèlin hripui vei an pung a, a thi zat pawh an pung tual tual a ni. Hei hian nasa takin khawvel pum economy a sawi nghîng mek a, eng ang chiaha nasain nge a tihṭhuanawp dawn a hriat lâwk theih loh," a ti.
Lalnunmawia Chuaungo chuan, sorkar laipui aṭanga sum hmuh a tlem zel avangin sorkar hnathawkte chu an ṭanho a pawimawh thu sawiin, "Sorkar laipui aṭanga sum dawn zat a kiam zel laiin, budget duan laia sum sênna tura chhût tel loh Covid-19 kaihhnawihah sum tam tak sên a ngai ta a ni," a ti a; Covid-19 dona tur leh Mizoramah chhuanchham an awm lohna turin mahni theihna zâwn ṭheuhah ṭan lak a ngaih thu a sawi.
Pawl hrang hrang aiawh kal khawmte chuan, kumin December thla thleng Mizoram sorkar hnuaia Group A, B leh C-te hlawh (basic pay) aṭanga 10% leh group D-te hlawh (basic pay) 5% thla tin thawh an remti a ni. Chief Secretary chuan, Mizo tlawmngaihna rilru dik tak pûa lungrual taka sorkar hnathawkte'n an hlawh aṭanga sum tam tak pek an remti chu lawmawm a tih thu a hrilh.
Inhmuh khawmnaah hian Chief Secretary bakah, secretary to chief minister JC Ramthanga, Finance secretary Vanlalchhuanga, Planning secretary Dr C Vanlalramsanga, Home secretary Lalbiaksangi te pawh an tel a ni.