Congress party-in sorkar hotute an fak

Congress party chuan thuchhuah siamin, sorkar laipuiin Central pool aṭanga Mizoram tana MBBS seat a pek zat a tihtlem hnua tihpun leh a nih theihna tura Mizoram Higher & Technical Education minister R Romawia leh Mizoram MP pahnih - CL Ruala leh Ronald Sapa Tlau-te hmalakna chu chhuanawm an tih thu an tarlang.

MPCC thuchhuah chuan, Mizoram MBBS quota tihtlem a nih vanga Chief Minister-in Union Health Minister hnena lehkha a thawn nghal te, HTE Minister-in New Delhi-a sorkar laipui hotute a dawr nghal leh MP pahnihin hma an la nghalte chu lawmawm an tih thu a tarlang a, "Mizo zirlaite thlavâng an hauhsak hi fakawm kan ti hle," an ti.

Congress party chuan, Health & Family Welfare ministry-a secretary CK Mishra-a'n HTE minister R Romawia hnenah BDS seat pali pek belh a nih tur thu leh MBBS seat pawh a awm thei ang ang pek belh a nih tur thu a lo hrilh chu lawmawm an tih thu an sawi a ni.

MPCC chuan, tun thlenga MBBS seat chungchanga buaina a awm chhan bul chu MNF sorkar vang niin an sawi bawk.