V/C te hnenah computer sem a ni

LAD leh SIRD bultumin nimin khan Lunglei DLAO conference hall-ah Lunglei district huam chhunga V/C thlanchhuah 35 te hnenah computer sem a ni a, LAD minister PC Lalthanliana'n a hman pui.

PC Lalthanliana chuan khawtlang tana ṭangkai tak tur, tunlai khawvel changkang chho zela hmasawnna hmanraw pawimawh tak computer V/C-te hnena a thlawna sem thei tura ruahmanna siam a ni chu lawmawm a tih thu sawiin, "Hemi kawnga chak taka hmalatu LAD, Lunglei leh SIRD&PR Mizoram te an fakawm hle," a ti.

V/C kalkhawmte chu vantlang tana inpumpek a, rinawm tak leh tih tak zeta an mawhphurhna hlen chhuak

ṭhin tura fuihin PC Lalthanliana chuan, "Khawltlang leh eibar hmasawnna kawnga an hmalaknaahte sorkar department hrang hrang bel hnai ṭhin turin a chah pawimawh," a ti a, hmasawnna hnathawhna tur sum tam tham tak V/C-te kaltlanga thawh ṭhin a nih avangin rinawm a pawimawh thu a sawi.

Hrangturzo bialtu MLA Vanlalawmpuii Chawngthu pawhin nimin khan Khawlailung BRC Hall-ah a bial chhung­a khaw pasarih - Keiṭum, Bungtlang, East Lungdar, Lungkawlh, Lungchhuan, Mualchéng leh Khawlailung V/C-te hnenah computer a sem.

Computer hi RGSA scheme hnuaia State Institute of Rural Development & Panchayati Raj aṭanga sem a ni a; Vanlalawmpuii chuan, computer-te chu a hmanna tur dik taka hmang tura chahin, "Mamawh leh chhawr ṭangkai tur a ni a, mimal ta ni loin, khawtlangin an mamawha an hman tur a ni a, ṭangkai tak leh dimdawi taka hman tur a ni," a ti.