Serchhipah parking fee lak a ni dawn
Serchhip District Traffic Management Committee chu nimin khan an chairman Sangchhin Chinzah, Serchhip DC hoin a pisaah an ṭhu a; Kumin September thla laihâwl vel aṭangin Serchhip khaw chhung hmun thlan bik pangaah State Transport Authority (STA) ruahman angin motor parking fee khawn ṭan an rel.
Sangchhin Chinzah chuan, Serchhip khawpui chhung a thâwl a, mipui tana chenna nuam zawk leh him zawk a nih theih nan a chhunga lirthei che velte mumal taka khuahkhirh a ṭul thu sawiin, hmun lûn laite mumal zawka enkawl a nih theih nan parking fee khawn a nih tur thu a sawi.
Serchhip DC chuan, lirthei neitute chu lirthei an lei dawnah a dahna tur garage nei vek anga insawi an nih thu sawiin, an intiamkamna angin, kawngpui kama lirthei zana riah ṭhinte pawhin dan an zawm a ṭul tur thu a sawi a; dan zâwm lo lirthei neitute chu dan anga hrem theih an nih avangin, dan zâwm chunga lirthei enkawl ṭheuh turin a chah.
Serchhipa parking fee lakna tura STA ruahmanna
Area 1: DEO Office (AOC) aṭanga PWD (Town Hall) pêng inkar chhim lam zawng. Darkar khat leh a hnuai lamah two wheeler tan Rs. 5; LMV, maxicab leh town bus tan Rs. 10 a ni ang.
Area 2: PWD pêng aṭanga Police Beat Post (town bus stand) inkar, chhim lam zawngah darkar khat leh a hnuai lamah two wheeler leh three wheeler tan Rs. 5; LMV tan Rs. 10 a ni ang.
Area 3: Police Beat Post (traffic point) aṭanga tipper stand inkar zawngah darkar khat leh a aia tlemah two wheeler leh three wheeler tan Rs. 5; LMV, maxicab, LGV, leh MGV/HGV tan Rs. 10 a ni ang.
Area 4: IOC aṭanga PWD IB peng inkarah darkar khat leh a aia tlemah three wheeler tan Rs. 5 a ni ang.
Area 5: New Serchhip College pêngah darkar khat leh a aia tlemah three wheeler tan Rs. 5 a ni ang.
# Three wheeler leh LMV public service, sorkarin stand a pekte chu an stand-ah ni khat atan three wheeler-in Rs. 5 Leh LMV-in Rs. 10 an chawi ang. Hei hi an stand-a an dinna atan chauh a ni a, parking area dangah chuan parking fee rate pangngai an chawi ang.
# Lirthei pakhat ni khatah a dahna hmun pangaiah darkar 10 chin bak dah phal a ni lo a, chu aia rei dah ngai, ṭul bik a awm chuan thuneitute phalna lak a ngai dawn.
# Parking area atana puanna hmuna collector dil duhte tan dilna hun hawn nghal a ni dawn a, chanchinbua tender notice a chhuah aṭanga hun tiam chhungin a dil duh apiang tan dil theih a ni ang.