Mizoram chhunga Sponsorship deal lian ber

MFA Super Cup leh I Day Football champion Chhinga Veng FC leh TṬ Royte Group chuan nimin khan Mizoram football-a sponsorship deal lian ber an ziak. TṬ Royte Group hian Chhingcows hnenah hian season hnih chhungin nuai 21 an pe ang.

Chhinga Veng hian nimin tlai khan BS Farm, Falkland-ah kumin I Day Football an champion an lawm a, he hunah hian TṬ Royte Group nen inrem­na an ziak. He inremna hi tualchhung football bika sponsorship deal lian bera ngaih a ni.

Lawmna huna khuallian MFA honorary secretary Lal­nghinglova Hmar chuan, "Chhinga Veng FC-in season bul inṭan ṭha a, MPL ṭan hmaa nomawi pahnih Super Cup leh I Day Football-in champion thei hi a lawmawm. MPL-ah pawh in champion ngei theih nan duhsakna ka hlan che u," tiin an hlawhltinna a lawmpui a, club tana sum thawhtute fakin inpe zel turin a fuih bawk.

Chhinga Veng FC president Dr Jerry L. Pautu chuan, "TṬ Royte Group-in an sponsor tho Aizawl FC nen hian MPL-ah inzawmna kan nei lo a, kan elpui an ni chhunzawm zel ang," a ti a, hemi rual hian an sponsor tharte chungah lawmthu a sawi.

NECS / TT Royte Group managing director C. Nunsanga chuan Chhinga Veng FC nen an thawkho thei chu lawmawm a tih thu a sawi ve bawk.

Nimin vek khan Chhinga Veng FC senior vice president Lal­hriat­puia'n season thara Chhingcows jersey tlangzarhna hun a nei a. Chhinga Veng FC chuan champion pual hian veng chhunga kangmei tuarte tan YMA hnenah Rs 25,000 an hlan bawk.