Dan loa hnam dang rawn lut man

Bawngkawn Local Task Force (LTF)-te chuan May 4, Thawhṭanni khan an vengah inkhàrkhip hnua Assam aṭanga hnam dang dan loa Mizorama lut an man a, thuneitute hnenah an hlân nghal.

Bawngkawng LTF chairman K Lalmuankima hnen aṭanga Vanglaini thu dawn danin, hnam dang an man hi handyman anga insawiin Assam aṭangin Aizawlah a lut a, amah hi Bawngkawna dàwr pakhata thawk ṭhin a ni. A thawhna dawr neitu pawh hnam dang tho a ni a, an veng task force-te hnenah hriattir nghal a ni.

Hnam dang an man hi The Mizoram (Con­tainment and Prevention of Covid-19) Ordinance, 2020-in task force-te thuneihna a pek angin Rs. 5,000 chawitir a nih hnuah thuneitute hnenah pek a ni a, sorkar thuneitute'n quarantine centre-ah an dah nghal. Rs. 5,000 hi Bawngkawn LTF chuan sorkarah an chhûng dawn a ni.

K Lalmuankima chuan, inkhârkhip hnuah an venga hnam dangte chu identity card (ID) siamsak vek an nih thu sawiin, "Kan man tâk hi kan venga awm ṭhin a ni a, mahse, inkharkhip hmain Assam-ah a chhuk avangin ID a nei lo. Chuvang chuan, dan loin a rawn lût rû tih kan hre thei a ni," a ti.