GSDP aṭanga teha leibat tur zat bituk aia tam Mizoramin a bá

Mizoram sorkar chuan Medium Term Fiscal Policy Statement (MTFPS) in Gross State Domestic Product (GSDP) aṭanga chhûta leibá a neih tura a bituk aia tam leibá a nei.

September 6-8, 2022 chhunga Assembly session neiha Chief Minister-in Assembly House-a a pharh, State Finance Audit Report of the Comptroller and Auditor General (CAG) of India for the year ended March 31, 2021-a tarlan danin, MTFPS-in kum 2020-21 chhunga GSDP aṭanga chhûta Mizoramin leibá a neih tura a bituk (target) chu 27.85% a nih laiin, Mizoram leibá (debt) - GSDP ratio chu 34.51% a ni.

Kum 2020-21 chhung hian Mizoram sorkar leiba chu kum hmasa (2019-20) aiin cheng vbc. 1,202.83-in a pung. Kum 2019-20 tawpa Mizoram sorkar leibá chu cheng vbc. 8,678.26 a ni a, kum 2020-21 ah chuan cheng vbc. 9,881.09-ah a pung. GSDP aṭanga chhûta leiba zat chu kum 2019-20 ah 34.51% a ni a, kum 2020-21 ah chuan 33.98%-ah a tlahniam thung.

Kum 2020-21 khan Mizoram chuan kum 2014-15 hnu lamah a ṭum khatna atan Revenue Surplus a nei lo a, kum 2014-15 Revenue Deficit cheng vbc. 774.13 a nei a ni.