YMA-in ruihhlo dona atana an siam Rál vênbûk ram hruaitute'n an tlawh

NE Khawdungsei Branch YMA leh Village Defence Party (VDP) ten an khua leh Ngopa inkara ruihhlo tawlh rûk tihrêm a nih theihna tura rál venbûk an siam chu September 10, Inrinni khan Excise & Narcotics minister Dr K Beichhua leh bialtu MLA L Thangmawia ten an tlawh.

Rál vènbûk (checkgate no. 1) enkawltu NE Khaw­dungsei YMA hruaitute sawi danin, chhun zan zawmin ni 90 chhung rál vènbûk an riah chilh tawh. Rál vènbûk (checkgate no. 2) enkawltu NE Khawdungsei VDP hruaitute chuan, kum 20 dawn chhum lo chat loin ruihhlo do hna an thawh tawh thu ram hruaitute hi an lo hrilh.

END Minister chuan, ruih­hlo doa tlawmngaia thawk chhuak zawng zawng chungah a lawm thu sawiin, "Cheng khat mah hlawh lo, chawi belh, mahni hna ṭul pawh thawk hman lo, mite nun chhanna a nih avanga inpete an chhuanawm tak zet a ni," a ti.

Ruihhlo do chu tha thlah loa tih ngai a ni tih sawiin, "Do do mah ula'ng a rêm chuang lo ang, tia sorkar deusawhtute awm mah se, heng mite hian an hre chiang lo a ni," a ti a; ruihhlo chu do ni lo se Mizoram a chhiat lehzual tur thu a sawi.

Lengteng bialtu MLA L Thangmawia chuan, ruihhlo donaa a bial chhung khaw hrang hrangte ṭan lak dan sawiin, "NE Khawdungsei bakah hian Ngopa leh Sialkal tlangdung khuate pawh ruihhlo tihrêmna turin ngawrh takin an duty ṭhin. Kan bial khaw hrang hrangin ruihhlo doa thapui an thawh hian Mizoram hmun dang kâng kai ngei se a duhawm," a ti.

Minister leh MLA-te hian ruihhlo doa duty-te chu an thing­pui inna tur sum an pe a ni.