Damlo sum vbc 70 sorkarin a batsak laiin Kamrula, Zoramchhana, NECS etc bill a tâng ve lo - Congress

Mizoram Pradesh Congress Committee (MPCC) chuan, Mizoram sorkarin a hnathawkte hlawh a pek theih loh lai leh damlo inenkawlna cheng vbc. 70 chuang a bat laiin, an duhsak zawng contractor-te tan sum harsatna a awm ngai lo tih an sawi a, "Mizoram sum leh pai dinhmun hi siamṭhat mai theih tawh loh khawpa dinhmun chhiaah a awm a ni," an ti.

MPCC Media depart­ment hotute chuan September 10, Inrinni khan Aizawl Press Club-ah thuthar thehdarhtute an kâwm a; an chairman Dr Lallianchhunga chuan, MNF sorkarah sum leh pai harsatnain a vàwrtàwp a thleng mek tih sawiin, "Hetiang taka dinhmun chhiaah Mizoram sorkar a la awm ngai lo," a ti a; sorkarin sum lama harsatna a tawh mek lai leh contractor tam zawkin bill an lak theih loh laiin CM duhsak zawng contractor-te'n bill lakah harsatna an tâwk ngai lo tih a sawi.

MPCC lamin an tarlan dan leh RTI Act zawhna aṭanga a lan danin Kamlova Chhangte (Kamrul Mazumdar), Chief Minister laina hnai Zoramchhana, NECS leh sorkar mi pawimawh ṭhenkhat lam hnaite bill-te chu an thehluh niah an la thei a, bill tang a awm ve ngai meuh lo.

Dr Lallianchhunga chuan, Mizoram leiba nasa takin a pung a, sorkar hnathawkte'n thla tìrah hlawh an la thei tawh lo tih sawiin, "Finance Minister a ngawih reng laiin minister ṭhenkhatte'n sorkar hnathawkte hlawh lâk hun tur an duh hun hunah an puang a, health care bill bá pawh cheng vbc. 77 a tling tawh," a ti.

Mizoram sum leh pai dinhmun chu siamṭhat mai theih tawh loh khawpa dinhmun chhiaah a awm nia sawiin Lallianchhunga chuan, "MNF sorkar pawhin tihngaihna an hre tawh lo a, kil hrang hrangah pûk tur an dap ngat ngat reng. Sum awm hmasa apiang leiba rulh nan leh hlawhah a kal zel a ngai a, leiba thangah nghet takin Mizoram a táng ta a ni," a ti a; sum leh paiah Mizoram sorkar dinhmun a chhiat tak zet thu a sawi.
MPCC Media Chairman sawi danin, contractor-te hnena sum pek chhuah dan MPCC Media mi Lalhruaitluanga Bawitlung-in RTI Act hmanga July 15, 2022-a a zawhna chu Finance department-in an chhang duh lo a, Mizoram State Information Commission (MSIC)-ah lungawih lohna thlen a nih tak hnuah, MSIC thupek angin August 19, 2022 khan an chháng a ni. Chhannaah chuan sorkar treasury pakuain April 1, 2019 leh July 14, 2022 inkara contractor-te bill cheng nuai 100 chung lam an dawn ní leh an pek chhuah ní tarlan a ni.

Dr Lallianchhunga chuan, August 26, 2022 thleng khan Mizoram State Health Care Society-ah damlo bill táng cheng Rs 77,97,69,971 (vbc. 77.97) a awm laiin, Directorate of Health Services hnuaiah April 1, 2019 leh July 14, 2022 inkar khan civil works leh supply bill cheng nuai 100 chuang pek chhuah eng emaw zat a awm tih a sawi a, "Bill pek chhuah loh chhan zawhna chu, ‘Bill pekna tur mamawh zat sorkar aṭangin dawn a ni lo’ tia chhàn a ni," a ti.

RTI Act hmanga zawhna chhanna aṭanga a lan danin, kum 2022-23 atan MSHCS-ah mi/chhungkua 39,505 an inziak lut a, damlo bill táng mek Rs 77,97,69,971 chu mi 28,448-te bill niin, chu chu inziak lut zat aṭangin 72.01% a tling. "Health department hnuaiah chhungkaw 28,448-te damlo bill hrènsak an nih laiin, an duhsak zual contractor/supplier-te tan sum harsatna a awm ngai lo," tiin Lallianchhunga chuan a sawi.

MPCC Media Chairman chuan, sorkar hotute duhsak zawngte'n bill (sum) lâk kawngah harsatna an neih miah loh laiin, contractor tam zawkte chuan thla tam tak bill an la thei lo thung niin a sawi a; MSHCS-a medical bill táng vanga inenkawl zui thei lo chhungkaw tam tak an awm thu te, sorkar hnathawkte'n a hun taka hlawh an lak theih loh bakah GPF an lâk theih loh thu a sawi bawk.

MNF sorkarin Mizoram mipui tam zawk leh sorkar hnathawkte hnena pawisa pek tur a neih loh laia an duhsak zawng contractor-te bill an pe reng si chu mipui hmuhsitna dik taka an ngaih thu sawiin Dr Lallianchhunga chuan, "Sum leh pai harsatna tawh chhan hi Covid-19 vangah an puh zel a, hei hi mipui bum tumna dik tak a ni a, sum leh pai enkawlnaah kalphung mumal an neih loh vang leh, an duhsak zawngte vûrna kawnga tiam chin nei loa an chêt vang a ni," a ti.