Mizoramah lungalhthei zawn a ni dawn - Dr R Lalthangliana

Commerce & Industries minister Dr R Lalthangliana chuan, Mizorama hmun pahnihah lungalhthei (coal) laih chhuah tuma hmalak mek a nih thu a sawi.

Dr R Lalthangliana hian September 10, Inrinni khan Hotel Hyatt, Hyderabad-a ni hnih awh National Mines Ministers' Conference-ah thu sawiin, Mizoramah Regional Coal Exploration nei tura hmalak mek a nih thu a sawi a, "Coal India Ltd. Ministry of Coal hnuaia Central Mine Planning & Design Institute Ltd (CMPDIL) leh Mizoram sorkara Directorate of Geology & Mining ten kum 2018 khan thawhhona thu thlungin an thawk dun ṭan a, hmun pahnihah lungalhthei zawn tura ruahman a ni," a ti.

Minister sawi danin, Mizorama lungalhthei zawnna tur hmun pakhat chu Thinghlun ram, Mamit district-ah niin, sq.km 33-a zauah zawn tur a ni a; pakhat dang chu West Rotlang ram, Lunglei district-ah niin, sq.km. 48-a zauah zawn tur a ni.

Lungalthei zawnna tur hian Directorate of Geology & Mining chuan draft tender document siam a ni tawh a, kumin May thla khan CMPDIL-ah thehlut a ni. Tender document chu CMPDIL-in an endik tawh a, vetted comment an pek angin, siamrem ngaite siamrem a nih hnuah notice inviting tender (NIT) chhuah a ni ang.

Lungalhthei zawn hna chu company-te thawh niin, sum sên ngai tur zawng zawng chu sorkar laipui tum tur a ni a; Mizoram sorkara Directorate of Geology & Mining, Commerce & Industries department chu nodal department niin, logistic support ngai zawng zawng an buaipui dawn a ni.

Dr R Lalthangliana chuan, Mizoramah tuialhthei leh gas zawn hna pawh ONGC, Oil India leh Vedanta Ltd. ten an thawh mek thu sawiin, chak zawka hna thawh a nih theih nan Commerce & Industries department-in June 22, 2022 khan joint meeting an neih thu a sawi.

Minister sawi danin, Mizorama oil leh gas zawn hna chak zawka thawh a nih theih nan leh zawnna tura ruahman, tun thlenga la zawn lohna hmunte chu block hran siamin, global tender chhuah a nih theih nan ruahman a ni a; March 25, 2022 khan Geology & Mining director Lalṭhazuala leh Deputy Controller of Mines-te chu Directorate General of Hydrocarbons (DGH) pisa, Noida-ah an kal a ni.

National Mines Ministers' Conference-ah hian Union Coal & Mines minister Pralhah Joshi pawh a tel a; Dr R Lalthangliana hi Geology & Mining deputy controller of mines Lalremmawia'n a ṭawiawm a ni.