Bawngkawn-Durtlang khâm enfiah

Save Chite Lui Executive Committee ṭhukhawm thurel bawh-zuiin September 10, Inrinni khan Bawngkawn leh Durtlang khâm panga thing hmun (green area) la awmte chu Environment, Forest and Climate Change department-a principal chief conservator of forest (PCCF) RK Singh hoin sorkar thuneitute'n an enfiah.

Bawngkawn-Durtlang inkar khâm endiknaah hian Aizawl DC, Land Revenue & Settlement, Aizawl Municipal Corporation leh Save Chite Lui Coordination Committee aiawhte an tel.

Bawngkawn-Durtlang inkar khâm vel chu Chite lui hnár awmna a nih avang leh Chite lui châwmtu a nih avangin Save Chite Lui Executive Committee chuan tun hnai chhoa a chereu ta zel chu nasa zawka ngaihven ṭul niin an hria a; LRS minister Lalruatkima leh AMC hotute an sawipui hnuah Governor leh Chief Minister hnenah thil awm dan an thlen a ni.

Governor leh Chief Minister-te thuràwn leh thupek angin Bawngkawn-Durtlang inkar khâm vel chu ngun zawka enfiah a, a ṭul anga lo bawhzui turin Save Chite Lui Executive Committee ṭhukhawm chuan PCCF an ruat a; Committee thu angin PCCF leh sorkar thuneitute'n an enfiah ta a ni.