Mizoram sorkarin ráltlânte tan Cheng nuai 380 a hmang tawh

Home minister Lalchamliana tarlan danin, August 20, 2022 thlengin Myanmar tualchhung buaina avangin sahimna zawnga Mizorama lut mi 29,253 an awm tawh a, ráltlânte tan Mizoram sorkar chuan cheng nuai 380 a séng tawh.

September 6-8, 2022 chhunga Assembly session neih zawh takah Home Minister chuan Myanmar ráltlânte dinhmun a tarlang a; August 20, 2022 thlenga district commissioner-te'n an chhinchhiah, Home department-a an thehluh dan chuan, Mizoramah Myanmar ráltlân mi 29,253 an awm a, ráltlânte tan Mizoram sorkarin cheng nuai 380 a hmang tawh a ni.

Home Minister chuan, ráltlânte chu district hrang hranga refugee camp-ah dah an nih thu tarlangin, "Ṭhenkhat chu an chhungkhat laináte bulah an khawsa a, ṭhenkhat mi in man cháwia luaha khawsate pawh an awm. Tun dinhmunah relief camp 156 siam a ni tawh. 1st High Level Committee thuchhuah leh Home department instruction bawhzuiin DC-te'n ráltlânte hi district hrana an teivah chungchangah khauh takin an enkawl. Dan leh thupek zawm leh an tih tur leh tih loh tur chungchang hrilh mek an ni," a ti.

December 20, 2021-a High Level Committee on Myanmar Refugees ṭhukhawm chuan, Mizorama ráltlânte felfai taka chhinchhiah a, identity card pek ni se tia a rêl thu tarlangin Lalchamliana chuan, "Hemi bawhzui hian Home department chuan ráltlânte chhinchhiahna tur profoma leh ID card sample duangin, DC tin hnenah a thawn a ni. Ráltlânte chhinchhiah leh ID card pek chhuah hna hi zawh thawkhat a ni tawh," a ti a; ráltlân rawn lut thar leh haw an awm reng avangin a tahtawlin chhinchhiah hna kalpui reng a nih thu a sawi.

Home Minister chuan, High Level Committee on Myanmar Refugees hotute December 20, 2021-a ṭhukhawm chuan ráltlânte chhawmdawlna pek a remtih thu a tarlang a, "Hemi bawhzui hian Mizoram sorkarin ṭanpuina cheng nuai 380 a pe chhuak. Ráltlân lo lutte dawnsawn kawnga ruahmanna leh kalphung zam sate hi tun dinhmunah chuan a ṭha thawkhata ngaih a ni," a ti.

CHENG NUAI 380 HMANNATE
* Electric power lakna leh a kaihhnawih atan
* Tui lak leh dahkhawlna leh a kaihhnawih atan
* Hmeichhe thawmhnaw atan
* Damdawi leh inenkawlna atan
* Ei leh in leh ráltlân zinga MP leh MLA-te ṭanpuina atan
* DC-te committed liabilities atan