Assam police ngenna vangin END banner tàr lak thlak a ni

Covid-19 vanga Vairengte dái auto rickshaw stand-a Excise & Narcotics department (END)-in 'Excise & Narcotics Vairengte Station on Duty' tih an tàr chu Assam police ngenna vangin lak thlak a ni.

Vanglaini thu dawn danin, Covid-19 a lên avangin Mizoram sorkar chuan lirtheite endik tur leh dan loa Mizorama lut leh chhuakte veng turin Vairengte dáia autorickshaw stand-ah END mite a duty tir a. Tun hnaiah Assam police-te chu Vairengte dáiah lirthei hmangin an kal ṭhin a, engmah sawi loin END-te duty-na hmun chhakah kualin, Assam lamah an lêt leh ṭhin.

Hetih lai hian, Assam Forest department mi leh sate chu END duty-na hmunah kalin, an duty chhan an zawt a; END duty-te chuan, Covid-19 vanga Mizoram sorkarin duty tura an tih anga awm an nih thu leh an awm chen tur an hriat loh thuin an chhang. Assam Forest mi leh sate chu END duty-na hmunah ṭum hnih an kal a ni.

Hailakandi SP leh Kolasib SP-te chu Vairengte dáia Assam police-te an kal ṭhin chungchangah hian an inbia a; Hailakandi SP chuan, END duty-na hmun chu ramri tuma khawih danglam loh tura dah lai (status quo) a nih avangin 'Excise & Narcotics Vairengte Station on Duty' tih intár chu an ngaihmawh thu a sawi a; Kolasib SP chuan END-te duty chhan a sawifiah ve thung.

Superintendent of Police pahnihte an inbiak hnuah END-te'n 'Excise & Narcotics Vairengte Station on Duty' tih an tàr chu lak thlak a ni ta a; END-te erawh a pangngaiin a hmun ngaiah tho an la duty chhunzawm zel thung.