Myanmar ráltlânte chungchang Minister-in US sorkar hotute a hrilh
School Education minister Lalchhandama Ralte chuan September 10, Inrinni khan Washington DC, United States-ah US State department hotute an pisaah a kâwm a, Mizoramin Myanmar ráltlânte a dawnsawn dan a hrilh.
US State department hotute chuan, India sorkar nena indawr tawnna an neihah India sorkar leh Mizoram sorkar chu Myanmar ráltlânte ṭanpuinaah an thawhpui theih thu an lo hrilh niin Mizoram sorkar thuchhuah chuan a tarlang.
Sorkar thuchhuah tarlan danin, inkawmnaah hian Lalchhandama Ralte chuan, Mizoramin ráltlânte a mikhual dan te, sorkar, kohhran, tlawmngai pawl hrang hrang leh mipuite'n an lo buaipui dante a hrilh a; India danpuiin naupangte dikna chanvo a pek anga ráltlân naupangte chu lehkha zirtir an nih thu te, zirlaibu leh chawchhun a thlawna pek an nih thute a sawi.
Chief minister Zoramthanga’n ráltlân naupangte chu zirna pek a ngaih pawimawh thu te, zirlai naupang pung zel leh mamawh sang zelah chhawmdawlna tur hmanrua indaih tâwk loh avanga harsatna awmte CM-in India sorkar thuneitute a hrilh tawh thu leh an thawhpuina leh ṭanpuina a dil tawh thute a sawi bawk.
US State department thuneitute chuan, Mizoram sorkar, kohhran leh tlawmngai pawlte leh mipuiin Myanmar ráltlânte an chhawmdawl dan te, zirna, khawsakna, ei tur leh damdawi lam thlenga an lo pe chu lawmawm an tih thu Lalchhandama an hrilh a; India sorkar nena indawr tawnna an neihah, India sorkar leh Mizoram sorkar chu ráltlânte ṭanpuina turah an thawhpui theih thu an lo hrilh a ni.