KHAWTHLIR
Thisen pe
September 10, Inrinni khan KṬP-in thisen unit 117 an pe. KṬP, Mission Veng Branch chuan an kohhran hall kawtah thisen pek huaihawtin, Zoram Medical College tan thisen unit 62 an pe a, petute mipa 59 leh hmeichhia pathum an ni a; KṬP, Tanhril Pastor Bial pawhin an bial silver jubilee pualin Synod Hospital Blood Bank-ah thisen unit 55 an pe a, petute mipa 39 leh hmeichhia 16 an ni.
Minister-in hawng
Ngopa khuaa Eklavya Model Residential School leh Tribal Youth Development Centre chu September 10, Inrinni khan Social Welfare minister Dr K Beichhua'n a hawng. Minister chuan, sikul chu mahni ta anga enkawl a, zirtirtute nen thawhhona ṭha nei zel turin Ngopa mipui a chah. Sikul leh centre hi cheng vbc. 15.98 sénga sak a ni a, a hawnnaah hian bialtu MLA L Thangmawia pawh a tel a ni.
MLA-in pe
Lawngtlai West bialtu MLA C Ngunlianchunga chuan Mizoram House, Mumbai-a damlo thleng ṭhinte hman atan chawhmeh leh thlai dahṭhatna cooler a pe. Mumbai Mizoram House Damlo Welfare-te chuan C Ngunlianchunga chungah an lawm thu an sawi.
Power leina
Mizoram sorkar chuan kum 2022-2023 chhungin power leina atan cheng vbc. 152.41 an seng tawh a, hemi hun chhung vek hian power hralhna atan cheng vbc. 138.04 an hmu. Power hralhna consumer-te hnen aṭanga la hmuh loh cheng vbc. 20.01 a awm.
Police-in heroin leh kuhva man
Saitual police-te chuan September 10, Inrinni khan Keifangah lirthei pakhat aṭangin Myanmar aṭanga lak luh nia hriat kuhva rah ip 170 leh lirthei khalhtu Lalramliana (22), Melbûk, Champhai district an man. Kuhva rah hi Rs 9,66,875 hû a ni. Champhai police-te chuan Inrinni vêk khan Khankawn checkgate-ah lirthei pakhat aṭangin heroin gram 158 leh a neitua puh Lalrinpuii (37) , Rangvamual, leh lirthei khalhtu Vanlalropeka (26), Khawzawl Hermon Veng, Aizawl Tanhrila khawsa mek nia insawite an man.
In sak mek endik
Lengteng bialtu MLA L Thangmawia chuan September 10, Inrinni khan a bial chhunga Ngopa khua a tlawh a, Ngopa Chhimveng community hall leh SDEO pisa sak mek a endik.