Covid-19 positive enkawl lai 289 an awm

Mizoramah Covid-19 vei September 9, Zirtawpni khan mi 63 leh September 10, Inrinni khan mi 32 hmuh chhuah a ni a, nimin leh Inrinni khan hripui vei dam tawh mi 129 chhuahtir an ni. Covid-19 vanga thi an awm belh lo a, nimin tlai khan Covid-19 positive enkawl lai mi 289 an awm.

September 9-a Covid-19 positive hmuh chhuah mi 63-te chu mipa 31 leh hmeichhia 32 an ni a, rapid antigen test hmanga hmuh chhuah vek niin, swab sample 531 endik aṭanga positive zat chu 11.86% a ni.

Inrinnia hripui vei hmuh thar mi 32-te chu mipa 14 leh hmeichhia 18 an ni a, RAT hmanga hmuh chhuah vek an ni. Swab sample 193 endik aṭanga positive zat chu 16.58% a ni a; a záwnin ni 22 chhung positivity rate-in 20% a kai tawh lo.

Nimin khan hripui vei dam tawh mi 91 chhuahtir an ni a, Inrinni khan mi 38 chhuahtir an ni bawk.

IDSP record angin, Mizoramah Covid-19 vei 2,37,746 hmuh chhuah a ni tawh a, mipa 1,10,730 leh hmeichhia 1,27,016 an ni a, mipa aiin hmeichhia 16,286-in an tam zawk. Nimin tlai dar 5 thleng khan mi 2,36,738 (99.57%) chhuahtir an ni tawh a, mi 722 (0.30%) thi tawhin, enkawl mek mi 289 (0.13%) an awm.