MBBS leh BDS zir turte tan Counselling buatsaih a ni

Central pool hnuaia Mizoram quota-a Bachelor of Medicine, Bachelor of Surgery (MBBS) leh Bachelor of Dental Surgery (BDS) zir turte tan nimin khan Higher & Technical Education (Technical Wing), Chaltlangah counselling buatsaih a ni.

Counselling-ah hian Chakma zirlai palite inlan tum an awma lo dan tumin HTE pisa kawtah MZP bultumin zirlai hruaitute an pungkhawm a, police pawh eng emaw zat an awm. Mahse, Chakma zirlai zingah hian inlan tura kal an awm loh avangin buaina chhuak a awm lo. Zing dar 10 velah HTE secretary Benjamina hoin HTE hotute'n hriat tur pawimawhte counselling nei turte an hrilh hnuah counselling ṭan a ni.

Benjamina chuan, counselling neih hmasak ṭuma buaina a awm chu pawi an tih thu a sawi a, "Zirlaite'n MBBS leh BDS zir ngei se kan duh a, Chakma zirlaite tel theih lohna tur High Court-in a stay bawk si avangin counselling neih luh a ni. Dan loa kal a nih chuan contempt of court a nih theih bakah, admission thlenga cancel theih a nih avangin counselling kha kaltlangpui a ni," a ti.

Counselling tih ṭhat leh tura tih a nih hnu, August 18, 2017-ah Mizoramin Central pool hnuaia MBBS leh BDS seat a neih zat tihhniam a nih thu an hriat thu sawiin HTE Secreatary chuan, "Sorkar laipui hotute kan dawr a, mihring awm zat angin seat pek a nih thu kan hre chawp a ni," a ti a; seat hmuh belh theih a nihna turin theihtawp an chhuah thu a sawi.

HTE Secretary sawi danin, MBBS seat hi mipui nuai khat zelah seat pahnih leh a chanve tur a ni a, kum 2011 chhiarpui ang chuan Mizoramin MBBS seat 27 a nei tur a ni. Hmun dang aṭanga seat hmuh 10 paih a nih hnuah Mizoram chuan Central pool hnuaiah MBBS seat 17 a nei ta a ni.

Mizoramah doctor mamawhna a san thu te, thuawih taka family planning kalpui a nih vanga MBBS seat-in a tawrh chu thil dik lo a nih thute leh, college ṭha ṭhenkhat inpaihsak chu thil dik a nih loh thute Mizoram sorkar thuneitute'n sorkar laipuia thuneitute hnenah an thlen a ni.

Benjamina chuan, sorkar laipui thunei­tute'n MBBS seat chu sem darh vek a nih tawh avangin tun dinhmunah chuan inpek belh theih a nih loh thu an lo hrilh tih a sawi a, "Seat hnawhkhah loh a awm a nih chuan min pek belh min tiam a. BDS seat erawh chu Patna-ah pali min pek belh nghal a ni. MBBS pawh hmuh belh a nih theihna atan sorkar laipui lam kan be zui reng a ni," a ti.

HTE Secretary chuan, Chakma-te'n an zirlai paliin Mizoram quota-a MBBS leh BDS an zir theihna atan theihtawp an chhuah tih sawiin, "Kan tih theih bak harsatna a lo awm a nih chuan min dem lo ang che u," a ti a; Mizoram sorkarin theihtawp a chhuah thu a sawi.

Tun ṭum counselling-ah hian Chakma zirlaite koh tel an nih loh thu sawiin Benjamina chuan, "Sorkar chuan mipuite duh dan a thlir a, Zo fate chauh koh an ni. Kan HTE Minister-in Zofate tan chauh MBBS leh BDS seat hi dah tura a tih angin, tun ṭumah chuan Chakma zirlai palite koh tel an ni lo," a ti.

Counselling-ah hian Central pool hnuaia MBBS seat 17 leh BDS seat pasarih a neih leh RIMS, Imphal-a BDS seat pakhat hmuh belha zir turte thlan an ni. Kuminah hian Mizoram chuan Central pool leh NEC hnuaiah MBBS seat 29 leh BDS seat 15 a nei ta a ni.