Leimin vangin in paruk a chim

Nilaini zan leh Ningani zana ruahsûr nasa vangin Ningani zan khan Mizoram hmun hrang hrangah chhiatna a thleng a, in paruk a chim bakah, biak-in chhia a awm.

Ningani zan dar 9 vel khan Leng­pui Vengthara F Lalrinliana (f/o Rohmingthanga, Aizawl FC & Lal­chhuanmawia Fanai, Bengaluru FC) in, RCC building chhawng thum chu a dinnaa lungrem a chim avangin a chim. Rohmingthanga sawi danin, in hi a chhawng chung ber leh hnuai ber chu chenna atana luah a ni a, a chhawng laita chu dawr atana hman a ni. In chim lai hian in luahtute an awm lo a, thi leh hliam an awm lo. Nimin khan khawtlangin a senghawi hna an thawk a; bialtu MLA John Rotluangliana leh Mamit DC aiawhte'n a hmunah an enfiah a ni.

Phunchawngah pawh sabereka-khuangkaihin in panga leh biak-in pakhat a tichhia. In pakhat chu kawng thlang lamah a hnâwl a, in dang pali chu luah tlak lohin a tichhia. Phun­chawng branch YMA president Vanlalhlimpuia sawi danin, Sabereka-khuangkaihin kawng thlang lama in a hnawl hi Assam type, Lalawmpuia te chhungkaw luah lai a ni a, a chim hmain an tlan chhuak hman a ni.

Phunchawnga biak-in chhia hi UPC (North East India) biak-in a ni a, a âwn bakah a bang a chhe nasa a, a chhungah chirh a lut nasa bawk a; luah zui tlak loa ngaih a ni. Phunchawng khawtlang chu in chhiate senghawiin nimin khan an hnatlang a, bialtu MLA K Sangṭhuama'n hnatlang thingpui lumna senso atan pawisa leh silpauline a pe a, Aizawl DC pisa aṭangin an enfiah bawk.

Aizawl leh Mizoram hmun eng emaw zatah pawh leiminin kawngpui a hnawh a, PWD lamin nimin khan a theih ang angin an thianfai nghal a ni.