MPF tihhmingchhiat tumah MPCY-in CM Hawla an puh

MPC party ṭhalaite chuan thuchhuah siam­in, chief minister Lal Thanhawla chu dâwt hmanga Mizoram People Forum (MPF) tih­hmingchhiat tumah an puh a, an dem thu an tarlang.

MPCY chuan, tun hnaia CM Lal Than­hawla’n Congress Bhavan-a thu a sawiah, door to door campaign neih theih a nihna chhan chu MPF-te'n an phal vang tiin a sawi tih an tar­lang a, "MPF-te a puh hi thu belhchian dâwl lo a ni. CM Lal Thanhawla’n dâwt hmanga MPF-te a tihhmingchhiat tumna lian takah kan ngai a, CM hi kan dem tak zet a ni," an ti.

MPCY chuan, MPF leh Mizorama political party-te'n door to door campaign neih chung­chang an sawiho ṭumin, MPC tih loh party dang zawng chuan door to door campaign neih an hnial lo vek niin an sawi a, "Congress party phei chu door to door campaign neih ngei ṭha tia ṭang na ber an ni nghe nghe," an ti a; CM Hawla chu amah ngei pawh MPF leh political party-te thawhhona thu­thlung siam ṭha tia ziaka nemnghettu a ni tih inhre thar turin an chah a ni.