Mizo hminga hnam dang sumdawngte August 31 hmaa titawp turin hriattir

YMA sub-headquarters, Lunglei chuan, Mizo hming hawha hnam dang sumdawngte chu August 31, 2017 ral hmaa inthiar fihlîm ngei turin a hriattir nawn a; vai dawrah a dera a neitua in­chhál lo turin Mizo mipui an ngen bawk.

Lunglei sub-hqrs. YMA hruaitute August 24, Ningani zana ṭhukhawm chuan, tun hnaia Mizo hming hawha hnam dang sumdawng nia an hriat dawr an khàrtir mi 10-te chu an sumdawnnate Mizo ngeiin enkawl tura an intiam thei a nih chuan, intiamkamna ziahtir hnuah hawntir an rêl a; a ṭul anga en zui zel ni se, an ti.

Lunglei YMA-in Lung­leia Mizo hming hawha hnam dang sumdawng mi 19 dawr, August 1, 2017 aṭanga an khàrtir aṭangin mi 18 chu an intiam angin nimin khan dawr an hawntir a ni.

YMA sub-hqrs., Lung­lei hruaitute chuan, tun ṭuma Mizo hming hawha hnam dang sumdawng tireh tura an hmalakna chu a hlawhtling hlein an hria a; thuawih leh zâwldawh taka tuartu zawng zawng chungah lawmthu an sawi a ni. An hmalakna chu a tawp mai dawn lo a, Lunglei khawpuia YMA branch tinte chu an huam chhung ṭheuha Mizo hming hawha hnam dang sumdawng list lak khawmtir mek an nih thu an sawi bawk.