PMKSY-WDC hnuaia hmalaknate thlirlet

Kum 2016-17 chhunga Pradhan Mantri Krishi Sinchayee Yojana - Watershed Development Component (PMKSY-WDC) hmalakna thlirhona review meeting chu nimin khan Rural Development directorate conference hall-ah neih a ni a, RD minister R Lalzirliana'n a hmanpui.

R Lalzirliana chuan, PMKSY-WDC chu huam zau leh kawng hrang hranga mipui thleng pha project a nih thu a sawi a, "He project-in a tum ber chu ram bua (watershed area) ṭangkai zawka hman theih tura siam thar a ni. Mizoramah pawh eibar zawnna vang leh khawvel ṭhang zelin environment leh ecological balance nasa takin a tihchhiat mek avangin ram chang ṭha hmuh tur awm tawh lêk loin ram suat a ni," a ti.

PMKSY-WDC-in a tuam chinah tunlai thiamna leh Mizote ban phaka leilung ven dan te, tui renchem dan te, lo neih leh huan siam dan mumal zawka kalpui a nih thu sawiin RD Minister chuan, "Chutiang hmunahte chuan tui laknate siamin, horticulture leh agriculture bakah, ramngaw siamṭhatna lamah nasa takin hmalak mek a ni thei hi a lawm­awm hle," a ti a; PMKSY-WDC chuan leilung ven bakah, mi chhum­chhiate eizawnna bul a ṭansak thu a sawi.

Meeting-ah hian kumin April 20, 2017-a ram pum huapa North East & Hill Station state zinga ti ṭha ber lawmman, Prime Minister Award for Excellence in Public Administration, Siaha district-in a dawn chungchang Project Manager-in a sawifiah a; kum 2016-17 chhunga district tinte hmalakna aṭangin Mamit district hnenah Best District Award hlan a ni.

PMKSY-WDC hi Integrated Watershed Management Programme (IWMP) tiin kum 2009-10 khan 11th. Plan chhungah Prime Minister flagship programme atan ram chhung state zawng zawngah (Goa tiam loin) hmalak ṭan a ni a, kum 2027 thleng daih tura pawm a ni.

State tinte chu State Level Nodal Agency din tura tih an nih angin Mizoramah pawh Chief Secretary chairman-na hnuaiah State Level Nodal Agency, Mizoram Watershed Development Agency (MzWDA) tia hming vuahin din a ni a, State Perspective & Strategic Plan (SPSP) siam a ni. MzWDA hi The Mizoram Societies Registration Act, 2005 hnuaiah ziah luh a ni bawk.

Project atana sumte chu sorkar laipuiin 90% tumin, state sorkarin 10% a tum a; tun dinhmunah hian Central share aṭangin Rs. 2,24,38,99,840 leh state share aṭangin Rs. 23,82,97,300 hmuh a ni tawh a, institutional support fund Rs.3,64,44,191 dawn tawh a ni.

SPSP-ah hian project 170, project cost cheng nuai 94656.90 hmanga ram hectare 6,31,046 tuam turin duan a ni a; project 89-ah hmalak a ni tawh a, chu'ng zinga project 16 chu March 31, 2017 khan zawh tawh a ni. Project zawh tawhah hian cheng nuai 9365.25 sêngin ram hectare 62,435 tuam a ni.