Zirlaibu thupuia 'Insurgency in Mizoram' Tih vuah hi ṭha kan ti lo - Zoramthanga
MNF president Zoramthanga chuan nimin khan Mizo Hnam Rûna inkhawmah thu sawiin, "Hnam thinlung put tlat hi hnam tênau leh tlem zawk tan kan himna awmchhun a ni," a ti a; zirlaibuah thupui pakhata 'Insurgency in Mizoram' tih vuah chu ṭha an tih loh thu a sawi.
Zoramthanga chuan, Pathianin hnam hrang hrang a siam tih sawiin, "Hnam hrang hranga min dah aṭang hian mahni hnampuite ngainatna leh hmangaihna a piantir a, keimahniah a dah sa vek a, chu hnam thinlung chu nationalism a ni," a ti a; hnam dang maktaduai tam takin an hual vel Mizo mipuite inhumhimna leh inhung bikna atan Peace Accord-ah ILP leh ram neitu nihna dah a nih thu a sawi.
India ramah Kashmir tih loah Nagaland leh Mizoram chiahin ILP an nei tih sawiin Zorama chuan, "Political-a inawpbehna te, intam hleihnate leh economics-a inchîmralna vangtein kan ram leh kan hnam a boral thei a; kan ram, kan hnam, sakhua, custom leh culture a ral loh nan nationalism hi a pawimawh ber a ni," a ti.
MNF President chuan, 'Insurgency in Mizoram' tih thupuia vuaha zirlaibua dah chu ṭha an ti lo tih sawiin, "MNF kan sorkar chuan thlak danglam a ni ang," a ti a; India zalenna sualna chungchangah, 'Sepoy Munity' tia zirlaibua an lo dah tawh duh lo a, 'First War of Indian Independence' tia an thlak angin thlak ve ṭha an tih thu a sawi.
Tun hma chuan ram páwn aṭanga beihna a hlauhawm ṭhin a, tunah erawh huan chhung lam aṭanga beihna a hlauhawm tawh zawk tih sawiin Zoramthanga chuan, "Páwn lam aṭanga hotu rawn dah hi an tum ngar ngar ṭhin a, a tirah vai lemchangin inthlahrung takin an rawn lut a, tunah chuan an insawh nghet ta niin an hria a, zahna rêng nei tawh loin chal an hnawih sen a, coconut sawh kehte pawh zahthlakah an ngai tawh lo," a ti.
Nimina Mizo Hnam Runa inkhawm hi Modern Higher Secondary School-a political science zirlai 30 leh an zirtirtu pahnihte'n an chhim a; zirtirtu J Lalhruaisanga chuan, politics kalphung naupangte'n hriain inzir nan hmang se an duh vanga tel an nih thu a sawi.