Lengpuiah New Indian Movement zirho

Krishi Vigyan Kendra (KVK), Mamit buatsaihin nimin khan Lengpui Village Council Hall-ah New Indian Movement zirhona hun buatsaih a ni a, Lok Sabha MP CL Ruala'n a hmanpui.

CL Ruala chuan, eirukna, retheihna, chi leh chi inthliarna, firfiaka chetna leh thil ṭha lo dang umboa India ram thar din turin New Indian Movement-ah mipuite an pawimawh tih a sawi a, "India ram thar din tura intiamte'n an thu­tiam theihnghilh a, an ṭhuthluang mai mai a nih chuan kan nghahhlelh leh duh em em India ram thar chu kan thleng thei lo ang," a ti.

Ram chhunga eizawngtu tam zawk chu kut hnathawktute an nih angin sorkarin a ngai pawimawh tih sawiin Lok Sabha MP chuan, "New Indian Movement-ah pawh kut hnathawktute hmasawnna tur kawng buatsaih a ni," a ti a; kum 5 chhunga India thar (New India) din a nih theih nana ṭan la turin kalkhawmte a fuih.

Khualzahawm John Rotluangliana, bialtu MLA pawhin thu sawiin, Mizoram mipui 80% chu kut hnathawka eizawngtute an nih laiin, mahni tu leh fate kut hnathawktura inzirtir e­rawh an tlem hle tih a sawi a, "Kut hnathawktute tana chhenfakawm turin sorkar chuan ruahmanna chi hrang hrang a siam a, hnathawh kan tum tlat loh erawh chuan hlawhtlin ngaihna a awm lo a ni," a ti.