School fee 50% aia sang lâk loh tur

School Education minister Lalchhandama Ralte hoin nimin khan a pisaah zirna kaihhnawih pawl hrang hrangte'n school fee chungchang an sawiho. Inkhàrkhip avangin zirna-inte khâra zirna chhunzawm theih a nih loh chhung chu monthly fee 50% aia sang lâk loh ni se, tiin thutlukna an siam.

Lalchhandama Ralte chuan, Mizoram mai ni lo, khawvelin a la hmelhriat ngai loh Covid-19 hripui léng vangin Mizoramah pawh zirnain harsatna lian tak a tâwk tih a sawi a, "Kum danga sikul ṭan hun pangngaiah zirna-in hawng thei loin kan awm ta hial a. Hripui léng hian kan ram leh chhungkaw tin economy-a khawih avangin, kum danga kan kal dan pangngaia kal remchan lohna tam tak a awm. Kan harsatna tawh avang hian Mizorama zirna-in zawng zawngte inhriatthiamna thui tak neia kal turin ka ngen che u a ni," a ti.

School Education Minister chuan, Covid­-19 vanga harsatna tawh chhungin sikul hrang hrangte chu fee sang zawk la lo tur leh zirna-ina fee chi hrang hrang lak ṭhinte pawh titlem turin zirna-in hrang hrang neitute a ngen a ni.

Hetih lai hian, MZP-in May 4, Thawhṭannia press release an siamah Aizawla private school zinga sikul khàr chhunga school fee lak tum lo an hriatte an tarlang a; chu'ngte chu - St. Anthony's HSS, Willow Mount School, Bambatini School, Young Learners School, Mount Careth School, Durtlang Presbyterian English School-te an ni.

St. Joseph HSS leh Ar-Ells School-te'n zirlai zinga nu leh pa sorkar hnathawkte chuan fee a pangngaia pektir a, zirlai harsa, nu leh pa sorkar hnathawk lote chu fee 50% pektir leh, zirlai harsa lehzualte hriatthiam an tum bawk.

MZP-in private school neitute an dàwrna aṭanga an hriat danin, Oikos School, Living Water School, Holy Heart School, Home Mission School, Tiny Tots School, Staines Memorial School leh KV Multipurpose School-te'n an remchan dang anga fee hi bituk an tum zet a; nimahsela Mizoram Independent School Association (MISA)-in fee lak tura an rel avangin MISA thu angin lâk an tum leh ta niin an insawi.

Roman Catholic hnuaia­ sikul hotute chuan, India hmarchhak state-a Catholic sikulte chu inzawm khawm vek an nih thu an sawi. Tripura, Assam leh Meghalaya state sorkarte'n ngenna an siam angin, lockdown chhung­in fee an lâk loh thu leh, May 15, 2020 ral hmaa Mizoram sorkarin Mizorama Catholic school thuneitute hnenah ngenna a thlen chuan zirlaite aṭangin fee an lak dawn loh thu MZP hruaitute an hrilh a ni.

•    Mizoramah Covid-19 vanga inkhàrkhip neih chhunga zirna-inte hawn theih a nih loh chhung chuan zirlaite aṭangin monthly fee 50% aia sang lâk loh tur a ni.

•    Hun harsa kan tawh lai a nih avangin mi harsa, school fee pe thei lote chu ngaihnathiamna pe tur leh, a 

ṭul chuan fee âwl thlenga an harsatna sutkianpui turin kohhran leh private school zawng zawngte ngen a ni.

•    April 2020 atana school monthly fee a kima la tawhte pawhin May thla fee-ah an siam rem ang.