Horticulture-in thei/thlai a supply tir dan Chhui turin Chief Minister an ngen

Mizorama nursery neitu ṭhenkhatte chuan, thei leh thlai supply tur thlannaah Horticulture department-a officer ṭhen­khatte'n anmahni leh an laináte bakah, an duhsak zawngte nursery uchuak taka an duhsak nia an hriat thu ziakin tun hnai khan chief minister Lal Thanhawla hnenah an thlen a; thei/thlai supply danah thil dik lo tam tak a awm nia an hriat thu an hrilh.

Nursery neitu mi parukte hian August 21, 2017 khan CM Lal Thanhawla hnenah lehkha an thehlut a, Horticulture department-in thlai leh thei supply-tu tur a thlan danah thil dik lo tam tak a awma an hriat dante an sawipui. CM hian a lo ngaihven hle a, a ṭul anga hmalak a tum thu a lo hrilh niin an sawi.

An lehkhaah chuan, Horticulture department-in thlai ṭiak supply tur a thlan dawnah kum tam tak kal ta aṭangin NLUP tih lohah chuan tender koh a ni ngai lo a, Horticulture officer, nursery neite leh an thurualpuite'n supply chu an insem ṭhin. Ṭum hnih vel erawh chu strawberry leh dragon fruit atan tender chhuah a ni a, mahse, department officer leh an tuhrualpuite'n an insem vek a ni.

Strawberry supply tender koh a nihin, a chhangtute hriattir lâwk loin sût a ni a, November 2016-ah tender chhuah nawn niin, chhangtu mi pathum zinga pakhat chiah chhanna nung (valid) a awm a, kaltlangpui niin, July 10, 2017-ah Zopar Export Pvt.Ltd., Chanmari pek a ni.

Strawberry chu ram pawn aṭanga lak luh a ngai tih sawiin, "Ram pawn aṭanga thlai chi hrang hrang chi lak luh reng rengah tender koh a ni ngai lo a, supply zawng zawng hi Zopar Export-in an hui zo vek zel," an ti a; Zopar Export leh Horticulture department officer-te inkungkaih dan chhui chian a nih theih nana hma la turin Chief Minister an ngen.

March 17, 2017-ah dragon fruit tender chhuah a ni a, chhanna nung pasarih awmin, chhanna nung pasarih zinga pali chu Horticulture department officer-te leh an thurualpuite niin an tarlang.

June 16-ah supply order tihchhuah niin, mi pasarihte chu dragon fruit 8,700 ṭheuh supply tir an ni a, a hnuah a rûkin vawi tam tak supply order pek an ni. Supply order pek zingah Serchhip leh North Vanlaiphaia Horticulture Centre phei chuan dragon fruit an nei lo nia sawiin, chuti chung chuan tam tham tak supply anga ziah a ni tih an sawi.

Thlai/thei ṭiak supply tam ber zinga mi, Pudaite Nursery, Darkhuang ram, Mual­lungthu chu a neitu Lalṭawiliani, Chanmari, Aizawl anga chhinchhiah a nih tuh ziakin, "Lalṭawiliani hian nursery a nei ṭha lo a, thlai/thei ṭiak tlemte a nei chungin, tam tak neia insawiin tender a chhang ṭhin," an ti.

Lalṭawiliani hian kumin May 1 leh August 16 inkarah supply order vawi 13, Rs. 77,01,300 man a hmuh thu leh, Horticulture director Dr Elizabeth Saipari nen inthurual nia an hriat thu an sawi bawk.

Supply order an hmuh ve theih loh chung­changah department officer-te'n 'In nursery in tichangtlung lo,' tia an sawi ṭhin thu an sawi a, "An nursery angin kan tichangtlung ve thei lo a, Central aṭanga ṭanpuina lo kalte an hûi vek zel. Keini chuan keimahni sumin, ṭanpuina dawng mumal ve loin kan enkawl a, an nursery anga chang­tlungin kan enkawl ve thei lo a ni," an ti.

Nursery atan Central scheme leh project hrang hrangah ṭanpuina sum tak department-in a hmu tih tarlangin, chu'ng sumte chu a hman dan chhui chian ni se an duh thu CM an hrilh. Mi parukte hian CM hnena an lehkha thehluhah hian document hrang hrang an thil tel a ni.