AICSU-in Chakma-te venhimna Pe duh loah Chief Minister an puh

Delhi-a hmunpui nei All India Chakma Students’ Union (AICSU) chuan August 25, 2017 khan thuchhuah siamin, MBBS leh BDS zir tur thlanna counselling neihah NEET-a tling Chakma zirlaite venhimna pe duh loah chief minister Lal Thanhawla an puh a, an dem thu an tarlang.

AICSU chuan, NEET-a tlingte counselling neihpui ni, August 25 zingah Chakma zirlai hruaitute'n Aizawl SP hmuin, counselling-ah Chakma zirlaite an kal theih nan Chakma zirlai palite chu venhimna pe turin an ngen a, mahse, SP chuan a tihhlawhtling duh lo niin an tarlang a, "August 21, 2017-ah Chief Secretary, Director General of Police (DGP) leh Higher & Technical Education (HTE) Secretary hnenah venhimna dil a ni bawk a, mahse, hnâwl a ni," an ti.

Counselling chu HTE depart­ment-in chawpchilh takin a buatsaih a, zirlaite hriattirna pawh a awm mumal hman lo nia sawiin AICSU chuan, "Chakma zirlaite hnenah counselling-a kal turin hriatirna pek a ni lo," an ti a; Aizawl SP-in Chakma zirlaite venhimna a pek loh avang leh counselling neihna HTE pisa kawtah MZP-te an punkhawm bawk si avangin Chakma zirlaite chu counselling-a inlan turin an kal ngam ta lo niin an sawi.

AICSU tarlan danin, August 25, Zirtawpni chawhnu lamah Chakma zirlaite'n HTE Secretary chu New Secretariat-a a pisaah hmuh an tum a, mahse, pisaah a awm loh thuin a chhang. Chakma zirlai palite chuan an pual bikin HTE Secretary pisaah counselling neih an duh a ni.