Mi 335-te mit thlaksak tawh

Mizorama eye bank a awm hnu, July 2008 aṭanga kumin 2017 thlengin Mizoramah mit darthlalang (cornea) pe mi 590 awm tawh a, chu'ng aṭang chuan cornea mamawh mi 335-te thlaksak an ni tawh.

Kumina Eye Donation Fortnight chu tunlai hian hman mek a ni a, August 25, Zirtawpni khan Health Worker Training School, Kulikawnah a hawnna inkhawm neih a ni. A hawnnaah hian Aizawl Civil Hospital (ACH)-a Eye Bank enkawltu Dr Lalhmingmawii'n Mizorama mit pek leh mit thlak tawh dan a sawi.

Dr Lalhmingmawii sawi danin, July 31, 2008-ah ACH-ah Eye Bank hawn a ni a, thih hnua mit pe tura intiam an awm ṭan. Mit donate-in mitthi tawhte hmel leh lan dan a tihmelhem lo a, mit lâk chhuah chhung pawh min 10-15 vel a ni. Mit donate hi mi hrisel ṭha pangngai, naupang aṭanga tar thlengin tih theih a ni a, HIV/AIDS, Septicaemia leh thisen aṭanga inkai chhawn theih natna vei tan erawh pek a remchang lo.

Eye Donation Fortnight hawnna inkhawm hi National Programme for Control of Blindness & Visual Impairment state programme officer Dr Lalremmawii'n a kaihruai a, Eye Bank-a counsellor Mimi Zodinthari'n eye donation chungchang a sawifiah.

Eye Donation Fortnight hi India ramah kum tin August 25 aṭanga Sep­tember 8 inkarah hman ṭhin a ni a; prime minister hlui Rajiv Gandhi-a'n a mit a pêk aṭanga hman ṭan a ni.