CYMA-in iron rod dawr an enfiah
Central YMA Kumpuan duty-te chuan Inrinni khan Aizawla dawr ṭhenkhatah thir (iron rod) zuarte'n bûkna atana an hman mekte a dik leh dik loh an enfiah.
Central YMA thurel tawh bawhzuiin Kumpuan duty-te hian iron rod zuarte'n bûkna an hman a dik leh dik loh an enfiah a; Aizawl tlâk lamah bul ṭanin, bûkna dik lo eng emawzat an man a, bûkna dik lo hmangtute dawr chu an khàrtir nghal zel a ni.
Kumpuan duty-te hnen aṭanga thu dawn danin, dawr ṭhenkhatin bûkna (patla) an tihdanglamte chu, bûklung dah lohna lam zawk, bûk tura iron rod an hlânkaina lamah a bika siam thir kual/kawm an khai a, chu chuan patla hmáwr kil zum lai tak a nawr bet a, iron rod khaina lam chu a tiuaithla ṭhin. Hei hian nasa takin iron rod rihna a tidanglam a ni.
Dawr hrang hrangah an tihdanglam dan a zirin patla bûk a danglam a; a tlangpuiin iron rod quintal khatah kg. 10-15 vel an hlêp niin an sawi. Patla tih danglamna thîr kawm chu dawr ṭhenkhatin a rûk a an hman laiin, dawr ṭhenkhat chuan ualau takin a hlanna thîrah an chàr zawm (welding) bawk.
YMA Kumpuan chairman Vanlalruata chuan, CYMA kumpuan 'Ram leh hnam humhalh' kalpui mekah, Mizoramah hnam dangin nasa takin sumdawnna an ti mek zel a, dan loa sumdawng satliah mai ni loin, Mizo mipui nasa takin an bum mek niin a sawi a, "Iron rod zuarte'n bûkna dik lo an hman avangin ni tin cheng nuai 10 chuang min eisak reng niin kan chhût. Theihtawp chhuahin kumpuan duty chuan hma kan la chhunzawm dawn a, mipui pawh kan thil lei danah kan fimkhur thar leh a ngai a ni," a ti.