Thuthar thehdarhtute'n PWD lungrem an en

PWD bultumin Inrinni khan thuthar thehdarhtute'n PWD Aizawl Road South Division hnuaia kum 2015-16 chhunga Aizawl hmun hrang hranga lung­rem (retaining wall)te an endik.

Lalrinkimi, Maubawk chuan RTI Act hmangin August 3, 2017 khan kum 2015-16 chhunga Aizawl Road South Division huam chhunga retaining wall siam­na hmun leh estimate amount-te a dil a, Aizawl Road South Division chuan August 8 khan retaining wall siamna hmun leh an senso zat zawhnate chu an chháng.

Mizoram BJP Vigilance Cell-te chuan retaining wall-te chu an hmu zo loa insawiin, August 22, 2017 khan Anti Corruption Bureau (ACB)-ah FIR an thehlut a; hei vang hian hmun 25-a retaining wall siamte chu a hmuna enpui turin PWD-te MJA an sáwm a ni.

Thuthar lakhawmtute hian Tuikhuahtlang, Damveng, Kulikawn, Melthum Silaimual, Samtlang, Lungleng, Hridaikawn, Mission Vengthlang, Nursery Veng, Mission Veng, Hipheia Road (Dinthar), Aizawl West College bul, Bethlehem Vengthlang road, PU College to College Vengthlang, Veng­hnuai field leh ITI Venga retaining wall-te an enfiah.

Hmun hrang hranga retaining wall an ente chu PWD hotute chuan an thawh dan leh an sensote an sawifiah a, retaining wall chu thawh anga lang si, a tak hmuh tur awm lo tawp chu a awm lo niin thuthar lakhawmtute chuan an hria a ni.

PWD executive engineer Sapzova chuan, retaining wall-te chu a duh apiang tan a hmun ngeiah en theih a nih thu sawiin, "A document-te pawh PWD Ai­zawl Road South Division of­fice-ah en theih reng a ni," a ti.