KHAWTHLIR

Kawng chhiat vangin tlan dawn lo
Kolasib leh Bairabi inkar kawngpui chu a chhiat tawh em avangin buhfai phur truck tan tlân a harsa a, Mizoram Truck Owners Association (MTOA) chuan September thla aṭangin an truck-te an tlantir tawh rih dawn lo nia thu dawn a ni. MTOA hian Bairabi panna kawngpui hi an sum sêngin an thawm ṭha nual tawh a ni.

Thisen pe
Inrinni khan Republic Vengthlang Branch KṬP-in Aizawl Civil Hospital tan thisen unit 56 an pe, a petute mipa 50 hmeichhia paruk an ni. Venghlui Branch leh Aizawl Branch KṬP-te'n a huhoin blood donation camp an huaihawt a, mipa 36 leh hmeichhia pasarihin Synod Hospital tan thisen unit 43 an pe. Aizawl Civil Hospital-ah Baptist Youth Fellowship-in unit 25, Sailulak Students Union-in unit 13 leh Mizoram Collegiate Boys and Girls Hostel-in unit riat an pe bawk.

ILP nei lo man
Armed Veng Branch YMA chuan tun hnai khan an veng chhunga hnam dang dan loa awmte zawn chhuah beihpui an thlak a, inner line permit (ILP) nei lo mi 10 manin, police hnenah an hlan nghal.

In panga chîm
Tun hnaia ruahsur nasa vanga Khawthlangtuipui lianin Inrinni khan Tlabung leh a chhehvel khuate a chîm leh. Tlabung bikah chuan chenna in panga a chîm a, in neitute chu an bungruate thiar chhuakin hmun him lamah an riak chhuak a ni.

Kulikawnah in chim
August 26, Inrinni zing dar 6 vel khan Kulikawna F Lawmkima (minister hlui) in, Assam type chhawng hnih chu a dinna lei a min vangin a chim a, a chim hmain ina chengte an tlan chhuak hman. Inrinni vek khan khawtlangin in chim senghawi hna an thawk a, bialtu MLA Lt.Col. ZS Zuala leh bialtu councillor Lalthansanga ten tlawhin, ṭanpuina an pe a ni.