VL Hruaia Covid-19 lakah a fihlîm ta

March 24, 2020-a Covid-19 a vei tih hmuh chhuah Rev. VL Hruaia (50), Mission Vengthlang, Aizawl chuan Covid-19 a vei tawh lo tih May 4, Thawhṭanni khan finfiah a ni ta.

Rev. VL Hruaia hi April thla tàwp lamah ZMC Covid-19 Testing Laboratory-a endiknaah Covid-19 a vei tawh lo tih hmuh a lo ni tawh a; a tihchian nan a hnuah ni li chhung a záwnin a swab sample lâk a ni a, chu'ngte chu a hlâwmin May 1 khan Silchar Medical College laboratory-ah thawn a ni. SMC chuan sample-te chu a negative vek tih May 4, 2020 zan khan a tichiang ta a; Mizoram sorkar pawhin Rev. VL Hruaia'n Covid-19 a vei tawh lo tih a puang nghal a ni.

Vanglaini palaiin a biaknaah Health mi­nister Dr R Lalthang­liana chuan, Mizorama Covid-19 vei awm chhunin a vei tawh lo tih finfiah a ni ta chu lawmawm a tih thu a sawi a, "Amah ṭawngṭaipuitu Mizo mipui chungah lawmthu ka sawi a, a enkawltu medical team-te chungah ka lawm a, ka chhuang tak zet a ni," a ti. 

Health Minister chuan, ZMC Covid-19 Testing Laboratory chu Covid-19 test theihna ni tawh mah se, ICMR-in code a la pek loh thu leh, chuvang chuan Rev. VL Hruaia result finfiah nan SMC Laboratory-a thawn leh a nih thu a sawi a; ZMC Laboratory chu ICMR-in code a pek theih thuai a beisei thu a sawi bawk.

Covid-19 chungchanga sorkar thu­puangtu Dr Pachuau Lalmalsawma, State Level Task Force on Covid-19 secretary ni bawk chuan Vanglaini palai zawhna chhángin, Rev. VL Hruaia'n hripui vei tawh lo mah se, damdawi-in aṭanga chhuahtir theih hun tur sawi lâwk theih a nih loh thu leh, chawlhkar khat emaw tal chu damdawi-inah a la awm a rinawm thu a sawi.

ZMC-SRH Covid-19 Bulletin nimin tlaia chhuak chuan, Rev. VL Hruaia chu a taksa a la chak tâwk loh avangin damdawi-inah enkawl rih a ni dawn tih a tarlang a, "Dam taka damdawi-in a chhuahsan theih nan kan ṭawngṭaipui zel dawn nia," tiin mipui an ngen a ni.