Vairengte kaltlangin mi 926 haw
Mizoram sorkarin India hmarchhak state pali - Assam, Manipur, Meghalaya leh Tripura-a Mizoram mi tangkhangte haw a phalsak hnuah May 4, Thawh-ṭanni zan dar 9 thleng khan Vairengte kaltlangin mi 926 an haw tawh.
Vairengte checkgate-a medical duty officer Dr C Vanlalhlimpuia'n zawhna chhánga Vanglaini a hrilh danin, Vairengte kaltlanga haw, medical duty-te'n an enfiah leh chhinchhiah zingah Aizawl district mi tam berin, mi 420 an ni a; a dangte chu - Lawngtlai district mi 165, Siaha district mi 120, Lunglei district mi 108, Kolasib district mi 50, Serchhip district mi 34, Champhai district mi 14, Mamit district mi paruk, Saitual district mi panga leh Khawzawl district mi pali an ni.
Dr C Vanlalhlimpuia chuan, Tripura lam aṭanga haw tur tih loh, state dang aṭanga haw turte chu Mizoramah an lut kim tawha an ngaih thu Vanglaini palai a hrilh.
Vairengte checkgate-ah hian February 11, 2020 aṭangin medical screening tih ṭan a ni a, March 12 aṭangin medical mite chhun zan zawma an duty ṭan thu sawiin Dr C Vanlal-hlimpuia chuan, "Vairengte damdawi-ina staff-te an thawkrim hle. Screening point-a medical duty-te pui tur hian Vairengte mi volunteer eng emaw zat an awm reng bawk," a ti.